Apple компанийн зүгээс даваа гаригт М4 чиптэй, шинэчлэгдсэн загварын iMac компьютераа танилцууллаа. Шинэ iMac ирэх сарын 8-наас худалдаанд гарах бөгөөд хамгийн хямд загвар нь 1,299 ам.долларын үнэтэй байх ажээ. M4 iMac мөн уламжлалт мөнгөн өнгөнөөс гадна ногоон, шар, улбар шар, ягаан, нил ягаан өнгийн сонголттойгоор худалдаалагдана. Дэлгэцийн хувьд өмнөх 24 инчийн 4.5К Ретина загварын дэлгэцийн нар болон гэрлийн туяа тусгалаас хамгаалсан нано гадарга бүхий шинэчлэгдсэн хувилбартай хийгджээ. Компьютерыг дагалдаж шинэчлэгдсэн загвартай Magic Mouse болон Magic Keyboard (хоёулаа USB-C оролтоор цэнэглэгддэг) ирэх ба компьютерын ард байрлах дөрвөн USB-C порт нь бүгд сүүлийн үеийн Thunderbolt 4 стандартын хурдаар файлуудыг шилжүүлэх хүчин чадалтай гэнэ.

Өнгөрсөн 9 сард Apple компани шинэ iPhone, Apple Watch, AirPods-уудаа танилцуулсан бол энэ долоо хоногоос эхлэн шинэ iMac-уудаа ийнхүү танилцуулж эхэлж байна. Apple-ийн маркетингийн албаны ахлах Грег Жосвиак энэ долоо хоногт iMac-ийн шинэ загваруудыг танилцуулах долоо хоног байх болно гэдгийг мэдэгджээ. Хэдийгээр iPhone-ий борлуулалтыг гүйцдэггүй ч Mac компьютерын худалдаа компанийн борлуулалтын томоохон хэсгийг эзэлдэг ба энэ оны хагас жилийн байдлаар Apple компани Mac компьютерын 7 тэрбум ам.долларын худалдаа хийсэн нь 2 хувийн өсөлттэй гарсан байна.