Нийт 16 баг оролцсон тус олон улсын тэмцээн өнгөрсөн сарын 21-нээс энэ сарын 3-ны хооронд болж өндөрлөлөө. Тэмцээний гранд финал Улаанбаатарын цагаар арваннэгдүгээр сарын 4-ний үүрээр болж, Mongolz баг уг тэмцээний хамгийн хүчтэй өрсөлдөгч болох Норвегийн Heroic багийн эсрэг тоглож, 3-1 харьцаагаар илүүрхэн хожлоо.

Ийнхүү Mongolz баг “Thunderpick World Championship 2024” тэмцээний аваргын цомыг гардан авч, цомыг дагалдах $500,000-ын мөнгөн шагналын эзэд болоод байна. Ингэснээр тэд чансаагаараа Дэлхийд тавдугаар байр луу дэвшин орлоо.

Тэгвэл манай багт хожигдож, хоёрдугаар байрт орсон Heroic баг $150,000, гуравт орсон 3DMAX баг $70,000-ын шагналыг халааслаад байна.

Берлин хотноо болсон уг тэмцээний гранд финалын тулааныг үзэж, мөн нутгийн багаа дэмжихээр олон арван монгол залуус иржээ. Энэ талаар Mongolz багийн зүгээс өөрсдийн фэйсбүүк хуудсаараа дамжуулан хүрэлцэн ирж дэмжсэн бүх хүмүүст талархал илэрхийлжээ.

Үүний өмнө Mongolz баг өнгөрсөн 6 сарын эхээр АНЭУ-ын нийслэл Абу Даби хотноо болсон “Yalla Compass 2024” тэмцээний аваргаар тодорч байсан юм. Одоо Mongolz багийг урд хөршийн Шанхай хотноо зохион байгуулагдах “Perfect World Shanghai Major 2024: Asia-Pacific RMR” тэмцээн хүлээж байна. Тус тэмцээнийг энэ сарын 11-13 өдрүүдэд зохион байгуулах юм.