Өнөөдөр АНУ-ын ерөнхийлөгчийн сонгуулийн санал хураалт явагдах гэж байна. АНУ-ын 60 дахь удаагийн ерөнхийлөгчийн сонгуульд Ардчилсан намаас 60 настай АНУ-ын дэд ерөнхийлөгч Камала Харрис, Бүгд найрамдах намаас 78 настай экс-ерөнхийлөгч Дональд Трамп өрсөлдөж байгаа ба тэд сонгуулийн өмнөх өдөр хамгийн сүүлийн сурталчилгааны уулзалтуудаа зохион байгуулж дууслаа.

Хэн ч ялж магадгүй байгаа эгзэгтэй чухал мөчид нэр дэвшигч Дональд Трамп Хойд Каролина, Пеннсильвани мужийн сонгогч, дэмжигчидтэйгээ уулзаж, улмаар эцсийн томоохон хэмжээний уулзалтаа Мичиган мужийн Гранп Рэйпидс хотноо зохион байгуулснаар сонгуулийн сурталчилгааны кампанит ажлаа өндөрлүүлсэн байна.

Харин түүний өрсөлдөгч Камала Харрис сонгуулийн өмнө сонгогч, дэмжигчидтэйгээ хийх сүүлийн арга хэмжээгээ Пеннсильвани мужийн Филадельфи хотын Урлагийн музейн өмнөх талбайд зохион байгуулсан бөгөөд түүнийг дэмжиж уг арга хэмжээнд дуучин Лэди Гага, Кэти Перри, телевизийн алдарт хөтлөгч Опра Уинфри зэрэг урлаг соёлын эмэгтэй алдартнууд ирж оролцжээ.

АНУ-ын ерөнхийлөгчийн сонгуулийн урьдчилсан санал хураалтад (early voting) 80 гаруй сая хүн оролцож, саналаа өгөөд байна.

Харин сонгуулийн өдрийн санал хураалт ихэнх мужид 5-ны өдрийн 19 цагт өндөрлөнө. Энэ удаагийн сонгуулиар ялалт байгуулсан эрхмүүд АНУ-ын 47 дахь ерөнхийлөгч, 50 дахь дэд ерөнхийлөгчөөр тодорч, 2025 оны 1 сарын 20-ны өдөр тангараг өргөж, албан тушаалдаа орох болно.