Хүн төрөлхтний эв нэгдлийн баяр “Парис 2024” зуны олимп, паралимпын наадмаас медаль хүртэж, дэлхийн тавцанд Монгол хэмээх нэрээ дуурсгасан бахархалт баг тамирчдад өнөөдөр МҮОХ-ны тэргүүн дээд шагнал “Алтан Од”, “Алтан Очир” одонг гардуулан өглөө.

“Алтан Од” одонгоор “Парис 2024” Олимпын мөнгөн медальт Б.Баасанхүү, Паралимпын аварга У.Сүрэнжав, ахмадын ДАШТ-ний гурван алтан медальт Ц.Раднаа нарыг шагнасан бол “Алтан Очир” одонгоор Паралимпын мөнгөн медальт Г.Болор-Эрдэнэ, дасгалжуулагч Ц.Баттулга болон таэквондогийн дасгалжуулагч Н.Эрдэнэбаатар, Д.Батнасан, жүдо бөхийн дасгалжуулагч М.Бундмаа, хөнгөн атлетикийн дасгалжуулагч Д.Махашири нар энгэрээ мялаав.

Энэ үеэр МҮОХ-ны Ерөнхийлөгч, ОУОХ-ны Гишүүн Б.Баттүшиг “Олимпизмын нэгэн дээвэр дор олимп, паралимп нь салшгүй холбоотой. Та бүхний хөдөлмөр, гавьяа хүүхэд багачууд, ард иргэдэд эерэг бүхнийг түгээх гэрэл гэгээ” хэмээн онцоллоо.