Эрчим хүчний зохицуулах хорооноос хэрэглэгчийн цахилгааны тарифыг 2024 оны арваннэгдүгээр сарын 15-ны өдрөөс, дулааны тарифыг 2025 оны тавдугаар сарын 16-ны өдрөөс бодит өртөгт хүргэж, дараах байдлаар мөрдүүлэхээр болсон байна.

Цахилгааны дундаж тариф 1 кВт/ц тутамд 216 төгрөг байсныг 280 төгрөг болгож бодит өртөгт хүргэнэ.

2019 оноос хойш айл өрхийн цахилгааны хэрэглээнд ямар нэг өөрчлөлт ороогүй байсан бөгөөд Эрчим хүчний реформын хүрээнд 140 төгрөг байсан өрхийн дундаж тарифыг хэрэглээнээс хамааран тооцохоор болсон байна. Тухайлбал, тухайн сарын хэрэглээнээс хамааран,

• эхний 150 кВт.ц хүртэл хэрэглээг 175 төгрөгөөр,
• дараагийн 150-300 кВт.ц-ийн хооронд байгаа хэрэглээг 256 төгрөгөөр,
• 300 кВт.ц-аас илүү гарсан хэрэглээг 285 төгрөгөөр тус тус тооцно.

Өөрөөр хэлбэл иргэд эрчим хүчийг хэмнэлттэй, хэрэглээндээ тохируулж хэрэглэвэл бага үнээр тооцогдож, бага төлбөр төлнө. Ингэснээр айлуудын цахилгааны хэрэглээний 1 кВт.ц тутамд 35-131 төгрөгөөр өөрчлөгдөж байна.

Манай улсын 788 мянган ахуйн хэрэглэгчдийн
45 хувь нь 150 кВт.ц хүртэл,
40 хувь нь 150-300 кВтц,
15 хувь нь 300 кВт.ц-аас дээш цахилгааныг тус тус хэрэглэдэг.

Одоо мөрдөж байгаа цахилгааны өдөр, шөнийн цагийн хоёр тариф дээр оройн “оргил ачааллын цагийн тариф”-ыг шинээр нэвтрүүлж байна. Хэрэглэгч айл өрх энэхүү цагийн ялгаварт 3 тарифыг сонгосон тохиолдолд шөнийн цагийн тарифт өөрчлөлт оруулахгүй хэвээр мөрдөнө.

Гэр хорооллын айл өрхүүдийн цахилгааны шөнийн хөнгөлөлт хэвээр хэрэгжиж байгаа бөгөөд Нийгмийн халамжийн дэмжлэг, туслалцаа зайлшгүй шаардлагатай өрхийн тарифт өөрчлөлт ороогүй байна.

Аж ахуйн нэгж, байгууллагын цахилгааны тарифыг дунджаар 30 хувиар өөрчилсөн. Улсын хэмжээнд айл өрхийн цахилгааны сарын дундаж хэрэглээ 220 кВт.ц байдаг ба 1 сарын цахилгааны төлбөр 36,220 төгрөг байсан нь 15,887 төгрөгийн өөрчлөлт орж 52,107 төгрөг болох юм.