Америкийн кантри, поп дуучин Тэйлор Свифт өнөөдрийг хүртэлх өөрийнхөө хамгийн том, нүсэр дэлхийн аялан тоглолт болох “Eras” аялан тоглолтоо өндөрлүүлээд байна. Уг аялан тоглолтын хамгийн сүүлчийн тоглолт ням гаригийн үдэш Канадын Ванкувер хотноо зохион байгуулагдсанаар түүний 2 жил орчим хугацаанд үргэлжилсэн дэлхийн аялал тоглолт хөшгөө хаагаад байна.

Анх 2022 оны 11 сард зарлагдан эхэлж байсан “Eras” буюу “Эрин үеүүд” хэмээх түүний тоглолтын гол агуулга нь дуучны анх уран бүтээлээ хийж эхэлснээс хойш өнөөдрийг хүртэл гаргасан бүх цомгүүд, үе үеийн хит уран бүтээлүүдийг багтааснаараа онцлогтой байсан ба өнгөрсөн хоёр жилийн хугацаанд тэрээр дэлхийн 53 хотод 149 тоглолтыг тавьж, 10,1 сая үзэгчдэд ая дуугаа өргөөд байгаа юм.

Энэ хугацаанд түүний аялан тоглолтын тасалбарын орлого 2 тэрбум ам.долларт хүрч, тоглолт зохион байгуулагдсан хот, орон нутгуудын эдийн засагт эерэгээр нөлөө үзүүлж, түүнийг нь “Тэйлор Свифтийн нөлөө” хэмээн эдийн засгийн судлагдахуун болгохын зэрэгцээ газар хөдлөлттэй ижил төстэй доргилтыг хүртэл үүсгэж байсан гээд аялын тоглолтын үеэр маш олон онцлох үйл явдлууд болж байжээ.

Дуучин Тэйлор Свифт саяхан хэвлэгдэн гарсан аялан тоглолтынхоо талаар бичсэн номдоо “анхны 6 цомгоосоо нийт 45 дууг сонгон аялан тоглолтдоо багтаан оруулсан явдал минь хуучны уран бүтээлүүддээ дахин шинээр дурлуулахад хүргэсэн” хэмээн бичсэн байна. Мөн тэрээр энэхүү аялан тоглолтыг “өөрийнхөө хамгийн их ядарч туйлдсан хэрнээ хамгийн зугаатай, хөгжилтэй, хамгийн их урам авсан, түүний амьдралд тохиолдсон хамгийн гайхамшигтай үйл явдлын нэг байсан” хэмээн онцолжээ.

Одоо Тэйлор Свифтийг хэсэг амсхийж, уран бүтээлээс түр завсарлага авч магадгүй хэмээн хэвлэлүүд бичиж байна. Тэрээр 2022 оны 12 сард Searchlight Pictures кино компанитай өөрийнхөө бичсэн зохиолоор кино хийх хамтын ажиллагааны гэрээ байгуулсан бөгөөд дуу хөгжмөөс завсарлага авах хугацаандаа буюу 2025 онд кино найруулагчийн суудалд сууж магадгүй байгаа ажээ.