Монголын Волейболын холбооны 2024 оны үндэсний дээд лигийн хоёрдугаар тойргийн дараах байдлаар эрэгтэй багуудаас “Хасу Мегастарс” баг 4 хожилтой амжилтын хүснэгтийг тэргүүлж буй бол “SG Hawks” баг мөн 4 хожилтой хоёрдугаар байрт, “Төв Миг” 3 хожилтой гуравдугаар байрт, 1 хожилтой “Өмнөговь Энержи” баг дөрөвдүгээр байрт эрэмбэтэй явж байна. Энэ жилийн дээд лигт шинээр гурван баг орж нийт 7 баг өрсөлдөж буй. Хэдий шинэ багууд орж ирсэн ч зарим багуудын бүрэлдэхүүн хүчтэй, чадварлаг сайн байгаа. Энэ хэрээр финалын шатанд өрсөлдөх багуудын нэрс тодорхой харагдаж буй.
Тэгвэл эмэгтэй багуудын тухайд сонирхолтой таамаг эвдсэн тоглолтууд болж өнгөрч байна. Дээд лигийн хошой аварга “Хөвсгөл Эрчим” энэ тойрогт тун тааруу тоглолтыг үзүүлж хүснэгтийн зургаадугаар байрт буй бол 2019 оны лигийн аварга, 2021 оны хүрэл медальт, хошой мөнгөн медальтай амжилт арвинтай “Энагурэ” мөн тааруу байж наймдугаар байрт, өнгөрсөн жил аваргын төлөө өрсөлдөн, мөнгөн медаль хүртсэн “Хилчин” баг долоодугаар байрт эрэмбэтэй явж байна.
Харин өнгөрсөн жил финалд өрсөлдөх эрхээ алдаж, хасагдсан “Улаанбаатар Финикс” 5 хожилтой буюу нийт 15 оноогоор хоёрдугаар тойргийн хүснэгтийг тэргүүлж буй бол “Хэнтий Уурхайчин” 4 хожилтой хоёрдугаарт, “Ховд Ижил Алтай Торгууд” баг гурав, “Хашхан Өвөрхангай” баг дөрөвдүгээр байрт жагсаж байна. Тэдний ардаас Хобби Эйс, Хөвсгөл Эрчим, Энагурэ, Минтонетт Говь багууд жагсаж байна. Хоёр тойргийн нийлбэр дүнгээр шалгарсан багууд финалын төлөө өрсөлдөх эрхээ авах учиртай. Тиймээс багуудын хувьд тоглолт бүр чухал.
1 болон хоёрдугаар тойргийн дараа улирлын нэгдсэн байдлаар “Улаанбаатар финикс” 11 хожилтой хүснэгтийг тэргүүлж буй бол “Ховд Ижил Алтай Торгууд”, “Хэнтий Уурхайчин”, “Хөвсгөл Эрчим” багууд тус бүр 9 хожилтой жагсаж байна.
Харин эрэгтэйчүүдээс шинэ өнгө төрх бүрдүүлсэн “SG Hawks” баг нэг ч хожигдолгүй 10 хожил, 29 оноогоор хүснэгтийг тэргүүлж байгаа бол 9 хожил 27 оноогоор лигийн иж бүрэн медальт “Хасу Мегастарс” баг хоёрдугаар байр, шинээр үүсгэн байгуулагдсан “Төв Миг” 6 хожилтой дөрөвдүгээрт, лигийн хошой аварга “Натур Бакс” баг 5 хожилтой удаалж байна.