Америкийн дуучин, жүжигчин Селена Гомез дуу зохиогч, хөгжмийн продюссер Бенни Бланко-той сүй тавьснаа олон нийтэд зарлаад байна.

Тэрээр өөрийн Instagram хуудсандаа асар том очир эрдэнэ шигтгэсэн сүйн бөгжний зургаа оруулж, доор нь “үүрдийн хамтын амьдрал маань энэ цаг мөчөөс эхэлж байна” хэмээн бичиж нийтэлжээ. Мөн тэрээр сүйн бөгжөө хуруундаа зүүсэн зураг болон Бенни Бланко-той хамт авахуулсан зургаа 423 сая дагагчтай Instagram хуудсандаа дараа нь нийтэлсэн байна.

Селена Гомез, Бенни Бланко хоёр хосын харилцаатай гэдгээ өнгөрсөн жил ил болгож байсан юм.

Поп од Тэйлор Свифт, реппер Карди Б, Lil Nas X, Холливудын жүжигчин Гвинет Пэлтроу, Женнифер Анистон, Сүки Уотерхаус зэрэг олон алдартнууд сүйт залууст баярын мэндчилгээ дэвшүүлж, хосуудад аз жаргал сайн сайхныг хүсээд байна.

Селена Гомез сүйт залуу Бенни Бланко-той дотно харилцаатай болохоосоо өмнө 2019 оны “I Can’t Get Enough”, 2023 оны “Single Soon” гэсэн дуунууд дээр хамтран ажиллаж байсан юм. Харин өмнө нь тэрээр Канадын поп од Жастин Бибер, мөн Канадын r’n’b дуучин The Weeknd нартай үерхэж байсан түүхтэй. Тэрээр хүүхэд багачуудад зориулсан Barney болон Disney-н телевизийн сувгуудад багаасаа жүжигчнээр ажиллаж, олонд танигдсан бөгөөд дараагаар нь дуу хөгжим болон кино урлагийн салбарт хүч үзэх болсон. Энэ жил Селена Гомез албан ёсоор тэрбумтнуудын жагсаалтанд орж ирсэн. Bloomberg-ийн зүгээс түүний хөрөнгийн хэмжээг 1.3 тэрбум ам.доллар хэмээн мэдээлж, дийлэнх орлого нь түүний гоо сайхны бараа бүтээгдэхүүний “Rare Beauty” компаниас орж ирдгийг онцолсон юм.

Селена Гомезыг мөн сүүлд шуугиан тариад байгаа “Эмилиа Перез” хэмээх мьюзикл кино болон “Only Murders in the Building” хэмээх телевизийн цувралд бүтээсэн дүрүүдээрээ ирэх жилийн “Алтан бөмбөрцөг” наадмын хоёр төрөлд тус тус нэр дэвшээд байгааг энэ даваа гаригт зарлан танилцуулсан билээ.