Өмнөд Солонгосын Үндэсний Ассамблей Арванхоёрдугаар сарын 14-ний өдрийн чуулганы нэгдсэн хуралдааны үеэр Ерөнхийлөгч Юн Сук Елыг огцруулах саналыг баталсан байна.

Санал хураалтад 300 гишүүн оролцож, 204 нь дэмжиж, 85 нь эсэргүүцэж, 3 нь түдгэлзэж, 8 нь хүчингүй санал өгчээ.

Энэ нь 2016 оны арванхоёрдугаар сард Ерөнхийлөгч асан Пак Гын Хэ, 2004 оны 3-р сард Ро Му Хён нарын дараа Өмнөд Солонгосын түүхэн дэх ерөнхийлөгчийн эсрэг 3 дахь удаагаа импичмент болж байна.

Үндсэн хуулийн 65 дугаар зүйлийн 3-т зааснаар үндэсний ассамблей огцруулах саналыг дэмжсэний дараа Ерөнхийлөгч Юны бүрэн эрхийг шууд түдгэлзүүлэх юм.

Импичментийн хурал нь эрүүгийн хэргийн шүүх хуралдааны журмын дагуу явагддаг бөгөөд гэрчүүдийг дуудаж, байцаах боломжийг олгодог. Хэрэг хянан шийдвэрлэх ажиллагаа олон нийтэд нээлттэй болдог байна.

Үндсэн хуулийн цэцийн тухай хуульд зааснаар шүүх хэргийг хүлээн авснаас хойш 180 хоногийн дотор шийдвэрээ гаргах ёстой. Гэсэн хэдий ч үндэсний хэмжээний хямралаас урьдчилан сэргийлэх зайлшгүй шаардлагатай байгаа тул бодит хяналтын хугацаа богино байх төлөвтэй байна. Нөхцөл байдлын хувьд, Ерөнхийлөгч Ро, Пак нарыг огцруулах хэргийг шийдвэрлэхээс эхлээд шийдвэр хүртэл 63, 91 хоног үргэлжилсэн байна.