Английн загвар өмсөгч Кара Делевинь алдарт дуучин Элтон Жоны зул сарын баярт зориулсан “Step Into Christmas” дууны видео клипэнд дуучны дүрийг бүтээж тоглосон байна.

Анх 1973 онд гарч байсан уг дууны шинэчилсэн хувилбарыг зул сарын баярт зориулан дахин гаргаад байгаа бөгөөд одоогоос 50 гаруй жилийн өмнө гарч байсан дууны шинэ клипэнд Элтон Жоны дүрийг бүтээсэндээ “одоо хүртэл итгэж өгөхгүй, зүүд зэрэглээ, мөрөөдөл шиг л зүйл болсон” хэмээн сэтгэгдлээ хуваалцжээ.

Сэр Элтон Жон өнгөрсөн зуны Glastonbury хөгжмийн наадмын үеэр Кара Делевиньтэй уулзаж байсан бөгөөд тэр үед хамтран ажиллах тухай яриа өрнүүлж байсан гэнэ.

Өдгөө 77 настай Элтон Жон видео клипэнд нь Кара-г тоглохоор болсныг дуулаад “гайхалтай боломж” хэмээн хэлж байсан бол 32 настай загвар өмсөгч Кара Делевинь алдарт дуучинг үргэлж шүтэн биширч, сонсож ирсэн талаараа онцолжээ.

Элтон Жоны “Step Into Christmas” дуу 1973 онд анх гарч байхдаа Их Британийн шилдэг дууны жагсаалтын 24-т орж байсан бол уг дууны шинэчилсэн хувилбар өнөөдөр тус жагсаалтын (UK singles chart) 15 дугаар байранд бичигдэж байна.