Самар цөмөгч модон цэргүүд Клара охиныг аврахын тулд Хулганы хаан ба түүний цэргүүдтэй хэрхэн тэмцэлдэж байгаа, ялалтын дараа баярлан бүжих цасан охидын түүхийг өгүүлэх “Цөмөөхэй” бүжгэн жүжиг “Монгол туургатан театр”-ын тайзнаа 2 дахь өдрөө тоглогдож байна. Төв аймгийн Соёл, урлаг, аялал жуулчлал, залуучуудын газар, “Elite dance studio” бүжгийн студи, “Монгол туургатан театр” хамтран энэ бүжгэн жүжгийг мэргэжлийн уран бүтээлчид, сурагчид зэрэг 208 хүний бүрэлдэхүүнтэйгээр үзэгчдэд толилуулж байгаа юм.

Суут хөгжмийн зохиолч П.И.Чайковскийн хөгжмөөр дэглэсэн уг бүжгэн жүжгийг анх 1892 онд Оросын хатан хаан Мария Александровнагийн нэрэмжит театрт тогложээ. Түүнээс хойш шинэ оны босгон дээр Дэлхийн өнцөг булан бүрт тоглодог болсон юм. Энэ бүжгэн жүжгийг тус аймаг Шинэ жилийн баярын өмнө уламжлал болгон 3 дахь жилдээ багачууддаа зориулж байгаа нь энэ юм.

Тус аймгийн засаг дарга Л.Төмөрчөдөр болон “Мөнгөн үдэш-2024” Шинэ жилийн баярыг зохион байгуулах комисс энэ бүжгэн жүжигт тоглосон нийт уран бүтээлчид, хүүхдүүдэд “Цөмөөхэй” хүүхэлдэй бүхий гарын бэлэг дурсгажээ.