Үндэсний мэдээллийн МОНЦАМЭ агентлагаас 28 жилийн турш уламжлал болгон зохион байгуулж буй “Монголын сайхан бичигтэн-2024“ олон улсын уралдаанд нийслэлийн 9 дүүрэг, 20 аймаг болон гадаадын дөрвөн улсаас нийт 1650 орчим бүтээл ирүүлснээс шилдгүүдийг шалгаруулж, өнөөдөр шагналыг нь гардууллаа.

Эх орны өнцөг булан бүрд суугаа бага ангийн хүүхдүүдээс авхуулаад настан буурлууд ч идэвхтэй оролцдог уг уралдаанд 8 ангилалд 1200 гаруй хүн оролцсон бөгөөд хамгийн залуу нь 6 настай нэгдүгээр ангийн сурагч ахмад нь 100 давсан настай өтгөс буурал байгааг зохион байгуулагчид нь онцолж байсан юм.

Оролцогчид шил, эсгий, арьс, хулсан дээр уран хатгамал, уран сийлбэр зэрэг олон төрөл, хэлбэрээр бүтээлээ туурвиж ирүүлсэн нь содон байлаа. 

Мөн удаагийн уралдаанд БНХАУ-ын Өвөр Монголын Өөртөө засах орны хорчин угсааны төлөөлөл, дээд монголчуудын төлөөлөл, ОХУ-ын буриад улсын уран бичээчид оролцсон нь манай уралдааны утга агуулга нэр хүндийг улам баяжууллаа гэж “Монцамэ” агентлагийн захирал Э. Содонтогос хэлэв.

Монгол улс босоо монгол бичгээ ахин сэргээн хэрэглээд 40 дэх жилтэйгээ золгож буй бөгөөд төрийн албан хэргийг хос бичгээр хөтөлж эхэлсэн түүхэн цаг үетэй ташралдаж байгаа нь онцлогтой гэв.