Хүнс, хөдөө аж ахуй, хөнгөн үйлдвэрийн яам, НҮБ-ын Хүнс, хөдөө аж ахуйн байгууллага хамтран, АНУ-ын Олон улсын хөгжлийн агентлагийн санхүүжилтээр хэрэгжүүлж буй “Хүнсний ногооны үйлдвэрлэл, зах зээлийн гарцыг нэмэгдүүлж эдийн засгийг дэмжих” төслийн хүрээнд Дархан-Уул аймагт анх удаа хөрсгүй, гидропоник ухаалаг технологи бүхий хүлэмж байгуулж байна. 1000 м² талбайтай венло загварын энэ хүлэмжийг 4 улирлын турш ашиглах боломжтой.
Хүлэмжийг Дархан-Уул аймгийн “Их Мориг” ХХК-ийн эзэмшил газарт “Батхүлэмж” ХХК барьсан байна. Санхүүжилтийн 30 хувийг хувийн хэвшил, 70 хувийг төслөөс гаргажээ. Энэ нь хүлэмжийн аж ахуйг урт хугацаанд тогтвортой авч явах хариуцлагын бүтэц, менежментийн тодорхой шийдлийг бий болгож байгаа аж.

Үүнтэй ижил загварын ухаалаг хүлэмжийг Төв аймгийн Баянчандмань суманд  барьж дуусжээ.
Уг 2 хүлэмжинд тарьсан хүнсний ногоог ирэх 3 дугаар сараас эхлэн зах зээлд нийлүүлнэ. Эдгээр хүлэмжинд өргөст хэмхийн үрсэлгээгээ бойжуулж, өчигдрөөс үндсэн тариалалтад шилжээд байна.