“Бриджет Жонс” киноны 4 дүгээр ангийн нээлтийн улаан хивсний ёслол лхагва гарагт Их Британийн нийслэл Лондон хотын Лестер талбайд зохион байгуулагджээ.

“Bridget Jones: Mad About the Boy” буюу “Бриджет Жонс: Залуу хүүд галзууртлаа дурласан нь” киноны улаан хивсний ёслолд гол дүрийн жүжигчин Рене Зельвеггер, Хью Грант, Чиветел Эжиофор болон бусад жүжигчид оролцсон байна.

Одоогоос 20 гаруй жилийн өмнө буюу 2001 онд гарч байсан “Бриджет Жонсын өдрийн тэмдэглэл” киноны гол дүрийг бүтээсэн өдгөө 55 настай жүжигчин Рене Зельвеггер, 64 настай жүжигчин Хью Грант нар ийнхүү ахин шинэ бүтээлд хамтран тоглож, нээлтийн улаан хивсний ёслолд хамтдаа оролцжээ.

Дээр дурьдсан “Бриджет Жонс” цувралын эхний анги 2001 онд, хоёрдугаар анги нь 2004 онд, гуравдугаар анги нь 2016 онд тус тус гарч байсан юм. Киноны шинэ ангийг Бриджет Жонсын тухай өгүүлдэг, хамгийн сүүлд буюу 2013 онд хэвлэгдэн гарч байсан номоос сэдэвлэн бүтээж, найруулагчаар нь Майкл Моррис ажиллажээ.

Кино цувралын энэхүү шинэ ангид эр нөхөр болох Марк Дарсигаа алдсан, 51 настай, бэлэвсэн ганц бие ээжийн амьдралаар амьдарч байгаа Бриджет Жонсын шинэ хайр дурлал, орчин үеийн болзооны хэв маягийн талаар өгүүлдэг бөгөөд түүний шинэ дурлалт залуусын дүрийг жүжигчин Чиветел Эжиофор, Лео Вудалл нар бүтээжээ.    

“Bridget Jones: Mad About the Boy” кино ирэх сарын 14-ний өдөр буюу Валентины баярын өдөр олон улсын кино театруудад нээлтээ хийхээр болсон байна.