Их Британийн алдарт дуучин, жүжигчин Марианна Фэйтфулл 78 насандаа таалал төгссөн талаар түүний хэвлэлийн төлөөлөгч мэдэгджээ.

Түүнийг пүрэв гарагт Лондон дах гэртээ, гэр бүлийнхээ гишүүдийн дунд тайван нойрссон талаар дуучны харьяалагддаг Republic Media компанийн зүгээс мэдэгдсэн байна.  

Марианна Фэйтфулл 1946 оны 12 сард Английн Хэмпстед хотод төрсөн бөгөөд 1960-аад оноос уран бүтээлийн гараагаа эхэлж, 1964 оны “As Tears Go By” дуу нь Английн хит дууны жагсаалтын шилдэг 10-т орж байсан юм.

Тэрээр Их Британийн алдарт Rolling Stones хамтлагийн ахлагч, дуучин Мик Жаггерын найз бүсгүй байсан, Rolling Stones хамтлагийн “Wild Horses”, “You Can’t Always Get What You Want” зэрэг агуу уран бүтээлүүдийг бичихэд нөлөөлсөн, зарим дуунуудыг нь бичихэд дэмжлэг үзүүлсэн гэдгээрээ олонд танигдсан уран бүтээлч байсан юм.

Тухайн үеийнхээ рок одуудын нэгэн ижил героин гэх зэрэг хүчтэй мансууруулах бодист донтож явсан дуучин Марианна Фэйтфулл донтолтоосоо салж чадсан түүхтэй.

Beck, Billy Corgan, David Bowie, Damon Albarn, Emmylou Harris, Jarvis Cocker, Lou Reed, Nick Cave, PJ Harvey, Metallica зэрэг хожмын олон рок одууд, хамтлаг уран бүтээлчид дуучин Марианна Фэйтфуллээс үлгэр жишээ авч байснаа ярьж байсан бөгөөд мөн түүнтэй хамтран ажиллаж байсан ажээ.

Rolling Stones хамтлагийн дуучин Мик Жаггер, гитарчин Кит Ричардс, Ронни Вуд нар эмгэнэл илэрхийлж, түүнд хүндэтгэл үзүүлсэн мэдэгдлүүдийг хийсэн байна.  

Марианна Фэйтфулл дуу хөгжмийн ертөнцөөс гадна мөн тайз, дэлгэцийн бүтээлүүдэд олон дүр бүтээсэн байдаг бөгөөд мөн амьдралынхаа туршид Жон Данбар, Бен Брифли, Жиоржио Делла Терза нартай гэрлэж, салж байжээ. Мөн тэрээр булими, хөхний хорт хавдар, уушгины эмфизем зэрэг олон хүнд өвчин тусч, давж гарч байснаас гадна түүнийг 2020 онд ковидын халдвар авах үед эмч нар тэсэхгүй гэж байсан ч тэрээр эдгэрч, дараа жил нь өөрийнхөө 21 дэх “She Walks in Beauty” хэмээх цомгоо гаргаж байсан удаатай.

Марианна Фэйтфулл 2009 оны Дэлхийн эмэгтэйчүүдийн шагнал гардуулах ёслолын Хүндэт шагналыг хүртэж байснаас гадна мөн Францын засгийн газрын хүндэт одон медаль хүртэж байсан юм.