“Emily in Paris” телевизийн цувралын гол дүрийн жүжигчин Лилли Коллинз анхны хүүхдээ өлгийдөн авсан байна. Тэрээр тээгч эхийн тусламжтайгаар хүүхэдтэй болжээ.

Өдгөө 35 настай жүжигчин Лили Коллинз, өөрийн нөхөр, кино найруулагч Чарли Макдауэллын хамт Инстаграм хуудсаараа дамжуулан анхны хүүхдээ өлгийдөн авсан талаараа албан ёсоор мэдэгдэл хийжээ.

Тэд охиндоо Туве Жэйн хэмээх нэрийг хайрласан бөгөөд дээрх мэдэгдэлдээ “Бидний гэр бүлд тавтай морил, Туве Жэйн Макдауэлл. Бидний гайхалтай тээгч эх болон үр хүүхэдтэй болоход маань тусласан хүн бүрт баярлаж талархсанаа илэрхийлж байна, та бүхэнд ямар их талархаж байгааг үгээр илэрхийлэхийн аргагүй” гэжээ.

Хосууд мэдэгдлийнхээ хамт мөн охиныхоо өлгийн дотроо унтаж байгаа зургийг нийтэлсэн байна.

Сонирхуулахад, жүжигчин Лили Коллинз Британийн алдарт дуучин Фил Коллинзын төрсөн охин бөгөөд тэрээр охинтой болсон талаараа зарлахаас нэг хоногийн өмнө аавдаа төрсөн өдрийн мэнд хүргэсэн нийтлэлийг мөн Инстаграмдаа тавьсан юм.

Английн Гилдфорд хотод мэндэлж, Америкийн Лос Анжелес хотод өссөн жүжигчин Лили Коллинз багаасаа жүжгийн урлагт суралцсан ба 1999 оноос хойш кино урлагийн салбарт ажиллаж, өнөөдрийг хүртэл 20 орчим кинонд гол болон туслах дүрийг бүтээж, 7 телевизийн цувралд тоглоод байна.

Түүний тоглосон, 2020 онд нээлтээ хийсэн Netflix-ийн “Эмили Парист” цуврал өндөр амжилт үзүүлж, 4 бүлэг гарчихаад байгаа бөгөөд 5 дугаар бүлэг хийгдэхээр болоод байгаа юм.