Кино сонирхогчиддоо зориулж энэ сард нээлтээ хийх шинэ, сонирхолтой телевизийн цувралуудыг танилцуулахаар бэлдлээ. 2-р сард HBO телевизийн “White Lotus” цувралын ээлжит шинэ бүлэг, алдарт жүжигчин Роберт Де Ниро-гийн тоглосон улс төрийн сэдэвтэй шинэ триллер цуврал, мөн 9 бүлэг бүтээгдэн гарч өндөрлөөд байсан шүүх, өмгөөллийн сэдэвтэй “Suits” цувралаас сэдэвлэсэн цоо шинэ цуврал гээд сонирхол татах бүтээлүүд гарах гэж байна. Ингээд энэ сард дэлгэцэнээ гарах 9 шинэ телевизийн цувралыг танилцуулья

1.Miss Austen – Хатагтай Остин

Английн алдарт зохиолч Жэйн Остиныг 1817 онд өөд болсны дараа түүний эгч Кассандра нь зохиолчийн олон хувийн эд зүйлс, захиа зэргийг дүүгийнхээ нас барсан хувийн амьдралыг олон нийтээс нуух үүднээс устгасан байдаг. Тэгвэл үүний жинхэнэ шалтгаан юу байж болох байсан талаар өгүүлсэн зохиолч Жилл Хорнсби-гийн бестселлер номоос сэдэвлэн бүтээсэн “Хатагтай Остин” цуврал энэ сарын 2-ны өдрөөс эхлэн BBC сувгаар гарч эхлэх юм. Энэ жил мөн алдарт зохиолч Жэйн Остины мэндэлсний 250 жилийн ой тохиож байгааг дуулгая.

2.Apple Cider Vinegar – Алимны цуу

Үйл явдал нь 2010-аад оны эхэн үе, Инстаграмын ид эрчээ авч байсан үед өрнөх энэхүү цувралын гол дүр Белле Гибсон хэмээх Австралийн инфлюенсер, луйварчин эмэгтэй өөрийгөө тархины хорт хавдартай хэмээн дагагчдаа хууран мэхэлж, байгалийн гаралтай хоол хүнс хэрэглэж, эрүүл амьдралын хэв маягаар амьдарч байгаагаа сурталчилж, үүгээрээ эрүүл амьдралын аппликейшн болон хоолны жорын ном зарж борлуулан, баяжсан тухай өгүүлдэг байна. Жүжигчин Кэйтлин Деверын гол дүрд нь тоглосон энэхүү шинэ цуврал Netflix платформд энэ сарын 6-ны өдөр нээгдэх юм.

3.Yellowjackets – Шар цамцтнууд

Өмнө нь энэ цувралын хоёр бүлэг гарч өндөрлөсөн бөгөөд гуравдугаар бүлэг нь ийнхүү 2 жилийн дараа дэлгэцнээ гарахад бэлэн болоод байна. Онгоцны ослоос амьд үлдсэн ахлах ангийн хөл бөмбөгийн багийн охидын тухайн үеийн болон аврагдсанаас олон жилийн дараа дахин учирсан үйл явдлын талаар өгүүлдэг энэхүү триллер жанрын цувралын шинэ бүлэгт өмнөх ангиудын жүжигчдээс гадна жүжигчин Хиллари Суонк шинэ дүрд тоглож байгаа нь үзэгчдийн сонирхлыг татаад байна. Yellowjackets цуврал энэ сарын 14-нөөс Paramount+ платформоор цацагдаж эхэлнэ.

4.The White Lotus – Цагаан бадамлянхуа

Мөн л өмнө нь 2 бүлэг гарчихсан өөр нэг сонирхолтой цуврал энэ сард эргэн ирж байна. Энэ бол HBO сувгийн “The White Lotus” цувралын 3 дугаар бүлэг. Шинэ бүлгийн үйл явдал өмнөх хоёрын ижил амралт зугаалгын газарт өрнөх бөгөөд энэ удаад Тайландын нэгэн амралтанд өрнөх ажээ. Холливудын жүжигчин Кэрри Күүн, Мишель Монахан, Лесли Бибб, Жэйсон Айзекс, Паркер Поузи, Уолтер Гоггинс нараас гадна энэхүү цувралд BLACKPINK хамтлагийн гишүүн, дуучин Lisa буюу Лалиса Манобал тоглосон нь үзэгчдийн анхаарлыг ихэд татаж байгаа. “The White Lotus” цуврал HBO сувгаар энэ сарын 16-наас эхлэн гарч эхэлнэ.

5.Newtopia – Ньютопиа

BLACKPINK хамтлагийн өөр нэгэн гишүүний гол дүрд нь тоглосон цуврал энэ сард мөн нээлтээ хийнэ. Энэ бол Jisoo-гийн тоглосон “Newtopia” хэмээх цоо шинэ цуврал бөгөөд үйл явдал нь зомбитой ертөнцөд өрнөдгөөрөө сонирхолтой. Түүнтэй хамт уг цувралд Пак Жён-мин, Ким Жун-хан нар тогложээ. “Newtopia” цуврал 2-р сарын 7-ны өдөр Өмнөд Солонгосын стрийминг үйлчилгээний Coupang Play платформ дээр нээлтээ хийхийн хажуугаар мөн Amazon Prime Video үйлчилгээнд байрших юм байна.

6.Zero Day – Тэг өдөр

АНУ-ын хэмжээнд олон үхэл, аюул гамшиг дагуулсан кибер халдлагын үеэр энэхүү халдлагын хэргийг мөрдөн шалгах тусгай хороог ахлуулахаар өмнө нь төрийн тэргүүн байсан Жорж Мюлленыг томилсноор уг цувралын үйл явдал өрнөх болно. Гол дүрүүдэд Роберт Де Ниро, Конни Бриттон, Жесси Племонс, Жоан Аллен, Лиззи Каплан, Анжелла Бассетт нар тоглосон, кино сонирхогчдын дунд хүлээлт үүсгээд буй энэхүү “Zero Day” хэмээх цуврал 2-р сарын 20-ны өдрөөс эхлэн Netflix платформоор олон улсын хэмжээнд цацагдах болно.

7.Jack Reacher – Жек Ричер

Зохиолч Ли Чайлдын зохиолуудаас сэдэвлэн бүтээж, өмнө нь 2 бүлэг гарсан “Jack Reacher” цуврал шинэ бүлгээрээ энэ сард эргэн ирж байна. Цувралын 3 дугаар бүлгийг Ли Чайлдын 2003 оны “Persuader” хэмээх номоос сэдэвлэн бүтээгээд байгаа юм. Үйл явдлын хувьд энэ удаад Жек Ричер Хар тамхитай тэмцэх хэлтсийн мэдээлэгчийг аврахын тулд гэмт хэргийн бүлэглэлийн эсрэг тэмцэх шаардлагатай болдог байна. Гол дүрийн жүжигчин Алан Ритчсон 2023 оны 12-р сард цувралын 3-р бүлгийн зураг авалт эхэлсэн тухай мэдээлж байсан бол өнгөрөгч оны 10-р сард 4-р бүлэг хийгдэхээр болсон тухай мэдээ цацагдсан юм. “Jack Reacher” цувралын 3-р бүлэг энэ сарын 20-ноос Amazon Prime Video-гоор үзэгчдийн хүртээл болно.

8.Win or Lose – Хож эсвэл хожигд

Гэр бүлийн сэдэвтэй Pixar-ын энэхүү шинэ цуврал бүтээлд Портланд Пиклес хэмээх 8 гишүүнтэй дунд сургуулийн софтболлын баг аваргын төлөөх тоглолтонд бэлдэж байгаа үйл явдал гардаг бөгөөд сурагчдад тохиолддог төрөл бүрийн асуудлуудыг өгүүлснээрээ онцлогтой цуврал болжээ. Багийн дасгалжуулагч Дэнийн дүрд жүжигчин, комедиан Уилл Форте дуу оруулсан байна. “Win or Lose” цуврал энимэйшн 2-р сарын 19-ний өдөр стрийминг үйлчилгээний Disney+ платформоор цацагдаж эхлэх юм байна.

9.Suits LA – Suits: Лос Анжелес

2011-2019 оны хооронд Америкийн телевизээр 9 бүлэг гарч өндөрлөсөн, хууль эрхзүй, өмгөөллийн сэдэвтэй Suits цуврал 2023 онд Netflix дээр тавигдсаны дараа мөн нэлээн шуугиан тарьж, тухайн жилийнхээ хамгийн их үзэлттэй цувралаар тодорч байсан юм. Suits цувралыг мөн 2018 онд Өмнөд Солонгос болон Япон улсуудад дахин бүтээж байсан бол 2023 онд манай улсад ч мөн хийж байсан билээ. Тэгвэл уг цувралаас сэдэвлэсэн Suits LA буюу үйл явдал нь Лос Анжелес хотод өрнөдөг шинэ цуврал энэ сард нээгдэхээр болоод байна. Шинэ цувралын гол дүрд жүжигчин Стивен Амелл тоглож байгаа бөгөөд эх цувралын Харви Спектерын дүрээр жүжигчин Габриэл Махт урилгаар богино хэсэгт дүр бүтээхээр болжээ. Suits LA цуврал 2-р сарын 23-наас Америкийн NBC телевизээр цацагдана.