АНУ-ын ерөнхийлөгч Д.Трамп трансжендер эмэгтэй тамирчдыг спортын тэмцээн уралдааны арга хэмжээнд өрсөлдөхийг хориглосон зарлигт гарын үсэг зурсан байна.
Ерөнхийлөгчийн энэхүү зарлиг тушаал шууд хүчин төгөлдөр үйлчилж эхлээд байгаа ба голчлон ахлах сургууль, их дээд сургуулиуд болон мэргэжлийн бус спортын тэмцээн уралдаануудад үйлчлэх ажээ.
Мөн уг тушаалын дагуу бүх хуулийн зохицуулалт, дүрэм журам, зааварчилгааг боловсруулан АНУ-ын Боловсролын яамд гарган өгч, хэрэгжилтийг нь Боловсролын яам хэрэгжүүлэхээр болжээ.
Энэхүү тушаалын дагуу өнгөрсөн оны 4-р сард Ж.Байдены засаг захиргааны зүгээс ЛГБТ сурагч, оюутнуудыг холбооны хуулиар хамгаална гэсэн байр суурийг өөрчлөхөөр болоод байгаа ч уг зарлигт трансжендер тамирчид цаашдаа ямар дүрэм журмаар спортын тэмцээн уралдаанд оролцох тодорхой нарийвчилсан зүйл заалтыг багтаагаагүй байна.
“Хэрвээ эрэгтэй тамирчдыг эмэгтэйчүүдийн спортын багт багтаан оруулж, аль эсвэл хувцас солих өрөөнд хамтад нь байлгавал хууль зөрчсөн гэж үзэн, холбооны засгийн газраас авдаг татаасыг цуцлах асуудал яригдах болно” хэмээн Д.Трамп өөрийн зарлиг тушаалыг тайлбарлан ярьсан байна.
Мөн тэрээр түүний зарлиг АНУ-ын Лос Анжелес хотноо зохион байгуулагдах 2028 оны зуны Олимпын наадмын тэмцээнүүд хамааралтай гэдгийг тодотгож, Олимпт оролцохоор зорьж буй, өөрсдийгөө эмэгтэй хэмээн тодорхойлсон трансжендер тамирчдад виза олгохоос татгалзах болно гэжээ. Д.Трамп зарлигт гарын үсэг зурахаасаа өмнө мөн “Лос Анжелесын Олимпын үеэр эрэгтэйчүүд эмэгтэй тамирчдыг үхтэл нь зодохыг миний засаг захиргаа харж, тэвчиж чадахгүй” хэмээн хэлсэн байна.
Бүгд найрамдах намын хууль тогтоогчид ерөнхийлөгчийн энэхүү шийдвэрийг спортын арга хэмжээнд шударга байдлыг сэргээнэ гэдгийг онцолж байгаа бол ЛГБТ хүрээлэл болон хүний эрхийн байгууллагуудын зүгээс бусдыг хүйс, өөрийгөө илэрхийлэх байдлаар нь ялгаварлан гадуурхсан зарлиг болсон хэмээн тодорхойлоод байна.
АНУ-ын ерөнхийлөгч Д.Трамп өнгөрөгч сарын 20-ны өдөр тангараг өргөж, албан тушаалдаа орсон өдрөө АНУ-д эр, эм гэсэн ердөө хоёр л хүйс байна гэдгийг албан ёсоор хуульчлан тунхаглах ерөнхийлөгчийн зарлигт гарын үсэг зурсан билээ.
Усанд сэлэлт, хөнгөн атлетик, гольф зэрэг олон спортын холбоод эрэгтэй бэлгийн бойжилтыг давсан трансжендер эмэгтэйг мэргэжлийн эмэгтэйчүүдийн төрөлд өрсөлдөхийг хориглосон байдаг ажээ.
АНУ-ын 13-аас дээш насны нийт иргэдийн 1 хувь нь трансжендер хүмүүс бөгөөд тэдний мөн цөөн хэсэг нь л спортоор хичээллэдэг тамирчид гэдгийг Калифорний их сургуулийн Уилльямсын институтиэс гаргасан статистик тоон мэдээлэл харуулаад байна.