Алдарт хөл бөмбөгч Криштиану Рональдогийн 40 насны төрсөн өдөрт зориулан бүтээсэн түүний хүрэл хөшөөг Нью-Йорк хотын Таймс Сквер гудманд нээгээд байна.

Ачааны автомашин дээр сүндэрлүүлэн Таймс Сквер гудманд авчирсан хөл бөмбөгчний хөшөөг ногоон, улаан, алтан шар өнгөөр будсан байна.

Криштиану Рональдо-гийн 3.6 метр өндөр хүрэл хөшөөг уран барималч Сержио Фурнари бүтээсэн бөгөөд хөшөөг нээх арга хэмжээний үеэр хөл бөмбөгчний олон шүтэн бишрэгчид цуглаж, Португал улсын туг далбааг олноороо мандуулан, Рональдо-гийн хэлдэг “Сиуууу” хэмээх үгийг хашгирч, шүтээнийхээ төрсөн өдрийг хамтдаа тэмдэглээд байна.

Сержио Фурнари мөн хөшөөний нээлтийн арга хэмжээний үеэр “Сиуууу” хэмээх Рональдо-гийн тэрхүү ялалтын уриа үгийг хамгийн олон хүн хэлсэн дэлхийн дээд амжилтыг тогтоохыг зорьсон боловч рекорд тогтоож чадсан эсэх нь одоогоор тодорхойгүй байна.

Криштиану Рональдо дос сантос Авейро нь 1985 оны 2-р сарын 5-ны өдөр Португал улсын Мадейра арлын Функал хэмээх жижиг хотод мэндэлж байсан бөгөөд лхагва гарагт тэрээр 40 нас хүрээд байна.

Замналынхаа туршид Манчестер Юнайтед, Реал Мадрид, Португалийн үндэсний шигшээ багт тоглож байсан К.Рональдо өнөөдөр Саудын Арабын мэргэжлийн хөл бөмбөгийн Аль Насср клубт харьяалагдаж байгаа юм. Forbes сэтгүүлээс гаргадаг дэлхийн хамгийн баян тамирчдын жагсаалтыг тэрээр сүүлийн 9 жилийн хугацаанд 4 удаа тэргүүлж байсан бөгөөд нийгмийн сүлжээний палтформууд дээрх түүний хуудсыг 1 тэрбум гаруй хүн дагадаг ажээ.