Улсын Их Хурлын Тамгын газрын Парламентын судалгаа, хөгжлийн хүрээлэн, Монголын Карл Попперын Мэтгэлцээний Нийгэмлэг, Отгонтэнгэр их сургууль хамтран ерөнхий боловсролын сургуулиудын сурагчдын дунд “Санан тунхаглах ирээдүй” Карл Попперын мэтгэлцээний улсын аварга шалгаруулах X тэмцээнийг 2025 оны 02 дугаар сарын 07-09-ний өдрүүдэд зохион байгуулна.

Төрийн ордонд маргааш нээлтээ хийх тус тэмцээнд 21 аймаг, Улаанбаатар хотын 128 баг, 384 багш, сурагч оролцохоор бүртгүүлжээ. “Мэтгэлцээн бол өрсөлдөөн бус соёл юм” уриатайгаар Монгол Улсын Анхдугаар Үндсэн хуулиа баталсны 100 жилийн ой, Монголын Карл Попперын Мэтгэлцээний Нийгэмлэгийн 10 жилийн ойг тохиолдуулан зохиож буй 10 дахь удаагийн Улсын аварга шалгаруулах тэмцээнд оролцогчид “Сонгуульд санал өгөх насыг бууруулах эсэх”, “Электрон тамхины хэрэглээг бууруулах хамгийн зөв арга”, “Хиймэл оюун ухааныг УИХ-ын гишүүн ашиглах нь”, “Хүүхдийг хатуу аргаар хүмүүжүүлэх нь…” зэрэг асуудлаар шийдэл дэвшүүлж, мэтгэлцэнэ. Энэхүү тэмцээн нь хүүхэд, залуусын хууль эрх зүйн мэдлэг ойлголтыг нэмэгдүүлэн чадавхжуулах, багаар ажиллах, үзэл бодлоо чөлөөтэй илэрхийлэх арга барилд суралцуулж, оролцоог идэвхжүүлэх үр дүнтэй юм.