БНХАУ-ын ГХЯ-ны хэвлэлийн төлөөлөгч Вашингтоны зүгээс Хятадын бараа бүтээгдэхүүний тарифыг нэмсэн явдлыг буруушаахын зэрэгцээ АНУ-д худалдааны асуудлаа шийдвэрлэх яриа хэлэлцээ явуулахыг уриалсан байна.

Хятадын ГХЯ-ны хэвлэлийн төлөөлөгч Линь Жянь лхагва гарагт хэвлэлийн бага хурлын үеэр хэлсэн үгэндээ Хятад улсыг сүрдүүлж, дарамт шахалт үзүүлээд ямар ч нэмэргүй гэдгийг сануулжээ.

Линь Жянь хэлэхдээ, “Хятад улс тарифын нэмэгдлийг ихэд дургүйцэж, эрс эсэргүүцэж байна. АНУ буруу үйлдлээ залруулж, эрх тэгш зөвшилцлөөр бие биенийхээ анхаарал хандуулж буй асуудлыг шийдвэрлэн, Хятад Америкийн харилцааг тогтвортой, эрүүл, үргэлжлүүлэн хөгжүүлэхийг Хятад улс шаардаж байна” гэжээ.

Тэрээр өнөөдөр бидэнд нэг талын эрх ашгийг баримталсан нэмэлт тариф ямар ч шаардлагагүй, худалдааны дайнд ялагч байхгүй, харин эрх тэгш, харилцан хүндэтгэсэн яриа хэлэлцээг явуулах хэрэгтэй байна гэжээ.

Мөн тэрээр АНУ-ын Шуудангийн албанаас АНУ нэмэлт татвар ногдуулсантай холбогдуулан Хятад, Хонконгоос илгээмж хүлээн авахыг түр зогсооно гэсэн мэдэгдлийн талаар мөн дурдсан байна. Линь Жянь хэлэхдээ, Хятадын засгийн газар Хятадын компаниудын эсрэг шударга бус дарамт шахалт үзүүлэхээ зогсоохыг АНУ-аас шаардаж байна, тэдний хууль ёсны ашиг сонирхлыг хамгаалахын тулд засгийн газар шаардлагатай арга хэмжээг авна гэжээ.

Трампын засаг захиргааны зүгээс Хятадын импортод ногдуулсан 10 хувийн нэмэлт тариф мягмар гарагаас эхлэн хүчин төгөлдөр үйлчилж эхэлсэн бол хариуд нь Хятад улс нүүрс, шингэрүүлсэн байгалийн хий зэрэг Америкийн тодорхой нэр төрлийн импортод нэмэлт тариф ногдуулах арга хэмжээ авч байгаагаа мөн мягмар гарагт зарлаж, уг арга хэмжээ ирэх даваа гарагаас хүчин төгөлдөр үйлчилж эхлэхээр болоод байгаа билээ.