Энэтхэг улсын ерөнхий сайд Нарендра Моди ирэх долоо хоногт АНУ-д айлчилж, АНУ-ын ерөнхийлөгч Д.Трамптай уулзахаар болсон тухай Цагаан Ордны зүгээс мэдэгджээ.

АНУ-д хууль бусаар нэвтэрсэн, визаны хугацаа хэтэрсэн зэрэг хууль зөрчсөн Энэтхэгийн 100 орчим иргэнийг АНУ-ын цэргийн онгоцоор нутагт нь буцааж, Энэтхэгийн Пунжаб мужид хүргэж өгсний дараагаар ийнхүү Энэтхэгийн ерөнхий сайдын АНУ-д хийх албан айлчлал батлагдлаа.

Блумберг агентлагийн зүгээс АНУ-д бичиг баримтгүй, хууль бусаар амьдардаг 18000 энэтхэгчүүд байгааг олж тогтоогоод байгаа бөгөөд цаана нь мэдэгдээгүй үүнээс ч олон хүн байгаа талаар  мэдээлжээ.

Бусад эх сурвалжууд мөн Н.Моди хоёр өдрийн айлчлалынхаа хүрээнд АНУ-ын ерөнхийлөгчийн зохион байгуулах оройн зоогийн арга хэмжээнд оролцоно гэж мэдээлж байна. Одоогийн байдлаар Энэтхэгийн ерөнхий сайдын АНУ-д хийх айлчлалын тов болон албан ёсны хөтөлбөрийн мэдээлэл хараахан тодорхой болоогүй байна.

АНУ-ын ерөнхийлөгч Д.Трампын анхны бүрэн эрхийн хугацаанд Н.Моди, Д.Трамп нар найрсаг, дулаан харилцаатай байсан юм. Өнгөрсөн долоо хоногт Н.Моди, Д.Трамп нар утсаар холбогдон, хууль бус цагаачлал, аюулгүй байдал болон худалдааны хамтын ажиллагааны талаар ярилцсан тухай Цагаан Ордноос мэдээлжээ.

Ажиглагч, шинжээчдийн зүгээс ч мөн хоёр удирдагчдийн уулзалтын үеэр яригдах гол сэдэв худалдаа болон цагаачлалын асуудал байх болно гэдгийг онцолж байна.

Нарендра Моди ийнхүү албандаа ороод удаагүй АНУ-ын төрийн тэргүүнтэй уулзалт хийх анхны гадаад улс орны удирдагчийн нэг болох гэж байна. АНУ-ын ерөнхийлөгч Д.Трампын хоёр дах бүрэн эрхийн хугацаанд түүнтэй уулзаж, яриа хэлэлцээ явуулсан анхны гадаад улс орны удирдагчаар энэ долоо хоногийн эхээр Трамптай уулзсан Израилын ерөнхий сайд Б.Нэтаньяху тодроод байгаа бол долоо хоногийн сүүлээр Японы ерөнхий сайд Шигэрү Ишиба Д.Трамптай уулзахаар болоод байгаа юм.