USAID буюу АНУ-ын Олон улсын хөгжлийн агентлагийн олон мянган ажилтнууд 2-р сарын 7-ны баасан гарагаас эхлэн ажлаас чөлөөлөгдөж эхэлнэ гэдгийг тус байгууллагын зүгээс мэдэгдээд байна.

АНУ-ын ерөнхийлөгч Д.Трампын засаг захиргаа USAID агентлагийг дэмий хоосон мөнгө үрж байгаа гэж үзэн, үйл ажиллагаа нь бодлого төлөвлөгөөтэйгээ уялдах шаардлагатай гэж үзэж байгаа юм.

Д.Трамп төрийн тэргүүний албаа хүлээж авсны дараа АНУ-ын гадаадын улс орнуудад дэмжлэг туслалцаа хэлбэрээр үзүүлдэг системийн үйл ажиллагааг зогсоосон нь богино хугацааны дотор олон улс орнуудад сөрөг нөлөөгөө үзүүлж эхэлсэн.  

АНУ-ын Олон улсын хөгжлийн агентлагийн ажилтнууд Ардчилсан намын хууль тогтоогчдын дэмжлэгтэйгээр агентлагийн орон тоог бууруулж байгаа явдлыг эсэргүүцэж, өөрсдийн амь насаараа дэнчин тавьж, улс эх орныхоо үндэсний ашиг сонирхлын төлөө хүчин зүтгэдэг гэдгээ хэлж байгаа юм.

USAID байгууллагаас гаргасан мэдэгдэлд “онц шаардлагатай ажиллагаанууд, тусгай төсөл хөтөлбөрүүдийн ажилтнууд болон удирдах түвшний ажилчдаас бусад албан хаагчид энэхүү тушаалд хамрагдана” гэжээ.

Мөн энэхүү цомхотголд тус агентлагийн ямар албан тушаалтай ажилтнууд хамрагдах нь тодорхойгүй байна. Агентлагийн албан ёсны вебсайт дээр нийтлэгдсэн мэдэгдэлд ажлаас чөлөөлөгдөх албан хаагчдад пүрэв гарагийн үдээс хойш бичгээр мэдэгдэх болно гэжээ. Түүнчлэн цомхотголд хамрагдсан хилийн чанадад ажиллаж байгаа албан хаагчдын буцах зардал болон аяллыг АНУ-ын Төрийн департаменттай хамтран зохицуулахаар болсон байна.

Энэхүү цомхотголын арга хэмжээг Засгийн газрын бүтээмжийн департамент хэмээх одоогоор албажаагүй байгаа шинэ яамыг тэргүүлэхээр болсон Элон Маскын явуулж эхлээд байгаа хэмнэлтийн бодлогын хүрээнд авч хэрэгжүүлээд байна.

USAID агентлагт цомхотгол явуулж байгаа энэхүү үйл ажиллагааг Ардчилсан намын хууль тогтоогчид “хууль бус”, “үндсэн хуулийг зөрчсөн” үйлдэл хэмээн шүүмжилж байна.

Дэлхийн 100 гаруй улс оронд хүмүүнлэгийн тусламж үзүүлдэг тус агентлаг 10,000 ажилтантай бөгөөд үүнээс 7000 орчим нь хилийн чанадад ажилладаг ажээ. 1961 онд байгуулагдаж байсан USAID агентлагийн жилийн төсөв ойролцоогоор 40 тэрбум ам.доллар буюу холбооны төсвийн 0.6% хувийг дангаараа эзэлдэг байна. Энэ долоо хоногийн эхээр USAID агентлагийг АНУ-ын Төрийн департаменттай нэгтгэсэнтэй холбоотойгоор төрийн нарийн бичгийн дарга Марко Рубио USAID-ын даргын албыг давхар хашихаар болоод байгаа юм.