Хэви метал хөгжмийн эцгүүд, үүсгэн байгуулагчид гэгддэг Английн алдарт Black Sabbath хамтлаг анхны бүрэн бүрэлдэхүүнээрээ эргэн нэгдэж, эцсийн удаа цорын ганц амьд тоглолтыг тавихаар болсноо зарлажээ.

Өдгөө 76 настай алдарт рок дуучин, “Харанхуйн хунтайж” хочит Оззи Осборн анх уран бүтээлийн гараагаа хамтдаа эхэлж байсан Black Sabbath хамтлагийнхаа гишүүдтэй эргэн нэгдэж, өөрсдийн төрөлх Бирмингхэм хотын Вилла Парк хүрээлэнд бүтэн өдрийн хөгжмийн наадам зохион байгуулж, сүүлчийн удаа тоглохоор болсон байна.

Black Sabbath хамтлагийн анхны бүрэлдэхүүн болох дуучин Оззи Осборн, гоцлол гитарчин Тони Айомми, басс гитарчин Гизер Батлер, бөмбөрчин Билл Уорд нар 20 жилийн дараа ийнхүү дахин нэгдэж тоглохоор боллоо.

2025 оны 7-р сарын 5-ны өдөр Английн Бирмингхэм хотноо зохиогдох энэхүү метал хөгжмийн фестивальд мөн Metallica, Pantera, Slayer, Gojira, Anthrax, Lamb of God, Mastodon зэрэг томоохон хамтлагууд оролцож, тоглохоор болсон байна.

Паркинсоны өвчин болон нуруу нугасны гэмтлээс болоод аялан тоглолтоо зогсоон, тодорхойгүй хугацаагаар завсарлага аваад байсан дуучин Оззи Осборны эхнэр Шэрон Осборн BBC агентлагт өгсөн ярилцлагадаа дуучны биеийн байдал сайн байгаа, анд найзуудтайгаа сүүлчийн удаа нэгдэж тоглохоор болсонд баяртай байгааг хэлсэн ч энэ тоглолт түүний хамгийн сүүлчийн тоглолт байх болно гэдгийг мөн онцолжээ.

“Back To The Beginning” хэмээн нэрлэсэн энэхүү хөгжмийн фестивалийг зохион байгуулахаар болсныг лхагва гарагт Шэрон Осборн, Black Sabbath хамтлагийн гитарчин Тони Айомми нар хэвлэлийн бага хурал зохион байгуулж мэдэгдсэн байна.

“Back To The Beginning” фестиваль нь мөн хандив цуглуулах хөгжмийн наадам болох бөгөөд цугларсан бүх хандивыг Паркинсон өвчний эсрэг тэмцэх Их Британийн “Cure Parkinson’s” хандивын сан, “Acorn Children’s Hospice” хүүхдийн асрамжийн газар, Бирмингхэм хотын хүүхдийн эмнэлэгт олгохоор болжээ.

Black Sabbath хамтлаг 1968 онд байгуулагдаж, улмаар анхны бэлтгэлээ Вилла Парк хүрээлэнгийн ойролцоох Ньютаун цогцолборт хийж байсан түүхтэй ажээ.