АНУ-ын ерөнхийлөгч Д.Трампын тарифын бодлогын хурц шийдвэрүүдийн улмаас зах зээлд тодорхойгүй байдал үүсэж, үүнээс шалтгаалан Америкийн гоо сайхны Estée Lauder компани төлөвлөж байснаасаа хоёр дахин илүү тооны ажилтнуудаа цомхотгохоор яригдаж эхэлжээ.

Гоо сайхны бараа бүтээгдэхүүн, хувцас загварын Clinique, MAC, Jo Malone, Bobbi Brown, Aveda, Tom Ford зэрэг брэндүүдийг эзэмшдэг толгой компани болох Estée Lauder нь дэлхийн хэмжээнд нийт 62000 ажилтантай бөгөөд энэхүү цомхотголын хүрээнд 5800-7000 орчим ажилтнаа халж магадгүй байгаа гэнэ.

Дэлхийн 150 улс оронд бараа бүтээгдэхүүнээ борлуулдаг Америкийн үндэстэн дамнасан тус корпораци Трампын засаг захиргааны тарифын болон хориг арга хэмжээний улмаас үүсэх эдийн засгийн хямралын эрсдлээс сэргийлж ойролцоогоор 1 тэрбум ам.долларын зардлаа танаж, хэмнэх шаардлага үүсээд байгаагаа онцолжээ.

Инфляцын түвшин өссөнтэй холбоотойгоор үйлдвэрлэлийн зардал нэмэгдсэнийг мөн тодотгож, “бид үйл ажиллагааны загвар моделио огцом өөрчилж, илүү хурдтай, илүү хэмнэлттэй, илүү хэрсүү болгоно” хэмээн тус компанийн гүйцэтгэх захирал Стефан де ла Фавери хэлсэн байна.

Estee Lauder компани бараа бүтээгдэхүүнийхээ түүхий эдийг Австрали, Мадагаскар, Индонези зэрэг олон орноос авч, Их Британи, Канад, Швейцарь, Хятад зэрэг мөн олон тооны улс оронд үйл ажиллагааны болон бүтээгдэхүүн хөгжүүлэлтийн салбаруудаа ажиллуулдаг байна. Тус компанийн зүгээс аль улсууд дах, ямар ажлын байрууд цомхотголд хамрагдах талаар тодорхой мэдээллийг хийгээгүй байна.

Трампын засаг захиргааны импортын тарифын нэмэгдлийн бодлого шийдвэр, ялангуяа Хятад улстай эхлүүлээд байгаа худалдаа болон хил гаалийн татварын дайн нь Хятад улстай бизнесийн үйл ажиллагаа нь салшгүй холбоотой байдаг олон компани, брэндүүдэд хүндээр тусах нь дамжиггүй болж эхэлж байна.