АНУ-ын ерөнхийлөгч Д.Трамп Олон улсын эрүүгийн шүүхийг хориглох тухай зарлигт гарын үсэг зурж, тус байгууллагыг “АНУ болон ойрын холбоотон Израил улсыг онилсон хууль бус, үндэслэлгүй арга хэмжээ авч байна” хэмээн буруутгажээ.
Д.Трамп Израилын ерөнхий сайд Б.Нэтаньяху-гийн Вашингтонд хийж байгаа айлчлалын үеэр дээрх тушаалд гарын үсэг зурсан байна. Өнгөрсөн оны 11-р сард Олон улсын эрүүгийн шүүхээс Б.Нэтаньяху-г Газын зурваст дайны гэмт хэрэг үйлдсэн хэмээн буруутгаж, түүнийг баривчлах тушаал гаргаж байсныг Израил улс эрс эсэргүүцсэн юм. ОУЭШ-ээс мөн Хамас бүлэглэлийн коммандлагчийг ч баривчлах тушаалыг хамт гаргасан билээ.
2002 онд байгуулагдсан ОУЭШ нь үндсэн дүрэм болох Ромын дүрмийг дэлхийн 120 гаруй улс орон соёрхон батлаж, дагаж мөрддөг бол 34 улс ирээдүйд соёрхон батлахаар хүлээгдэж байгаа юм.
Трампын гарын үсэг зурсан зарлигт Олон улсын эрүүгийн шүүхийн сүүлийн үед явуулж байгаа үйл ажиллагаанууд нь Америкийн иргэдийг гадуурхаж, эрхийг нь зөрчиж, баривчлагдах урьдчилсан нөхцлийг бий болгож буй аюултай үйлдлүүд бөгөөд үүгээрээ АНУ-ын тусгаар тогтнол, үндэсний аюулгүй байдал болон засгийн газрын гадаад бодлогыг дордуулж байна гэжээ.
Энэхүү зарлигийн дагуу АНУ болон түүний холбоотнуудын иргэдийг мөрдөн шалгаж буй ОУЭШ-ийн үйл ажиллагаанд дэмжлэг туслалцаа үзүүлж буй хувь хүмүүс, тэдний гэр бүлийн гишүүдэд хөрөнгө санхүүгийн үйл ажиллагааны болон визний хязгаарлалт тавьж байгаа ажээ.
АНУ нь ОУЭШ-ийн гишүүн биш бөгөөд тус шүүхээр АНУ-ын иргэн болон албаны хүмүүсийг шүүх явдлыг удаа дараа эсэргүүцсээр ирсэн юм. Цагаан ордны зүгээс ОУЭШ-ийг Израил улсын өөрийгөө хамгаалах эрх болон Иран улс, Израилын эсрэг бүлэглэлүүдийн явуулж буй дайсагнасан үйл ажиллагааг үл тоомсорлон орхигдуулж байна хэмээн буруутгалаа. Д.Трамп анхны бүрэн эрхийн хугацаандаа ч мөн ОУЭШ-ийг удаа дараа шүүмжилж, хэд хэдэн хориг арга хэмжээ авч байсан түүхтэй.
Ийнхүү АНУ-ын төрийн тэргүүний ОУЭШ-ийг хориглох тухай зарлиг нь Газын зурвасын 2 сая оршин суугчийг өөр байршилд дахин суурьшуулах, дайн дууссаны дараа Израилын тал Газын зурвасыг АНУ-д хүлээлгэн өгч, АНУ улс тухайн бүс нутгийн сэргээн босголт, хөгжил цэцэглэлтийг хариуцах тухай Трампын хийсэн мэдэгдлийн дараагаар гарлаа.
Долоо хоногийн эхээр мэдэгдсэн палестинчуудыг дахин байршуулах төлөвлөгөөний талаараа Д.Трамп пүрэв гарагт ахин мэдэгдэх үеэрээ Газын зурваст Америкийн цэргүүдийг оруулахгүй гэдгийг тодотгосон байна. Д.Трампын дэвшүүлж буй дээрх төлөвлөгөөг НҮБ-ын ЕНБД Антонио Гутерриш, Йордан, Египет, Саудын Араб, АНЭУ, Катар зэрэг Африк, Арабын улс орнуудын удирдагчид, мөн Их Британи, БНХАУ, Япон зэрэг улс орны зүгээс ч хурцаар шүүмжилж, эрс няцаагаад байгаа юм.
АНУ-ын төрийн нарийн бичгий дарга Марко Рубио хэлэхдээ Газын зурвасыг сэргээн босгох хугацаанд буюу түр хугацаанд палестинчуудыг өөр газарт байршуулах санал санаачилга гарсан гэжээ.