Реппер Ja Rule, DMX, дуучин Ashanti, Jennifer Lopez зэрэг олон уран бүтээлчидтэй хамтран ажиллаж, хит уран бүтээлүүдийг гаргаж байсан Америкийн хип хоп дуу хөгжмийн салбарын продюсер Irv Gotti 54 насандаа таалал төгсжээ.

Тэрээр 2000-иад оны эхээр хит болж байсан олон хип хоп, R&B уран бүтээлүүдийг гаргасан Murder Inc. лэйблийг үүсгэн байгуулснаараа алдартай.

Irv Gotti нь Женнифер Лопез/Ja Rule нарын “Ain’t It Funny”, Женнифер Лопезын “I’m Real”, дуучин Ashanti-гийн “Foolish”, “Always on Time”, реппер Fat Joe-гийн “What’s Luv?” гэх зэрэг олон зуун мянган хувь борлогдсон олон хит уран бүтээлүүдийг зохиож, продюсерлэж байсан юм.

Түүний үхлийн шалтгааныг албан ёсоор зарлаагүй ч Irv Gotti нь диабет өвчинтэй холбоотой эрүүл мэндийн асуудалтай байсан бөгөөд мөн 2024 оны эхээр цус харваж байжээ.

Irv Gotti буюу Ирвин Лоренцо нь 1971 онд Нью-Йорк хотын Куинс дүүрэгт төрж өссөн бөгөөд анх DJ Irv гэсэн нэрээр Нью-Йоркийн MC Mic Geronimo-г продюсерлэн уран бүтээлийн гараагаа эхэлж байжээ. Тэрээр 90-ээд оны дундуур Jay-Z, DMX зэрэг томоохон репперуудтэй хамтран ажиллаж, дараа нь өөрийн лэйблийг байгуулан, Ja Rule, Ashanti зэрэг уран бүтээлчдийг гарган ирж, Ashanti-гийн бие даасан анхны цомгоор тэрээр дуучны хамт 2002 онд Грэмми шагнал хүртэж байсан түүхтэй.

Гэвч 2000-аад оны дундуур түүний дуу хөгжмийн компани хууль бус хар тамхи, мансууруулах бодисын наймаатай сүлбэлдсэн, мөнгө угаасан хэрэгт холбогдсон ч хожим тэдгээр хэргийг хэрэгсэхгүй болгож байсан юм. Тэр цагаас хойш лэйблийн үйл ажиллагаа өмнөх шигээ амжилт үзүүлээгүйгээс гадна өнгөрсөн жил түүнийг нэрээ нууцалсан нэгэн эмэгтэй бэлгийн хүчирхийллийн хэрэгт буруутгасан ч өмгөөлөгч нар нь үүнийг эрс үгүйсгэсэн билээ.