Өнгөрсөн амралтын өдрүүдээр Энэтхэгийн Бангалор хотын хүн ихтэй Чёрч Стрийт гудманд гэнэтийн тоглолт хийж, сонсогч нартаа гэнэтийн бэлэг барихаар шийдсэн Британийн дуучин Эд Шийранг зөвшөөрөлгүй гудамжинд дуулсан хэргээр цагдаа нар баривчилсан байна. 

Эд Шийран Энэтхэгийн хотуудар аялан тоглолт хийж явахдаа ийнхүү Бангалор хотын цагдаа нарт баригдсан байна. Хотын цагдаагийн газраас гудамжинд дуулах дуучны хүсэлтэд татгалзсан хариу өгсөн талаараа мэдэгджээ.

Дуучинг хөгжим техникээ гарган ирж, дуулж эхлэх үед нэгэн иргэн цагдаад дуудлага өгч, дуудлагын дагуу эргүүлийн цагдаа нар ирэн Эд Шийраны тоглолтыг зогсоож, түүнийг баривчилсан байна.

Харин Эд Шийран өөрийн инстаграм хуудсандаа эсрэг утгатай мэдэгдлийг хийсэн байна. Тэрээр түүнд гудманд тоглож, дуулах зөвшөөрөл байсан хэмээн мэдэгджээ.

Сүүлийн жилүүдэд Энэтхэг улсад гадны хамтлаг, дуучдыг авчирч тоглуулах бизнес цэцэглэн хөгжиж байгаа бөгөөд Эд Шийраны хувьд өнгөрсөн жил Мумбай хотноо бүх тасалбар нь зарагдсан шоу тоглолтыг амжилттай хийсэн учраас энэ удаад Энэтхэг улсад аялан тоглолт хийж байгаа ажээ.

Тэрээр энэ сарын 8, 9-ний өдрүүдэд Бангалор хотод тоглоод байгаа бол энэ долоо хоногийн лхагва гарагт Шиллон хотод, пүрэв гарагт Энэтхэгийн нийслэл Дели хотод тоглох юм байна. Мөн тэрээр үргэлжлээд Хятадын Ханжоу хотноо энэ сарын 24, 25, 26, 28-нд, ирэх сарын 1, 2-нд тоглох бол 4-р сард АНЭУ, Катар улсуудад тоглож, цаашлаад Европт аялан тоглолт хийхээр төлөвлөсөн байна.