Өмнөд Солонгосын NewJeans хамтлаг нэрээ өөрчлөн NJZ болгож байгаагаа зарласан байна.

NewJeans хамтлаг өөрсдийн харьяалагдаж байсан ADOR лэйблтэй маш удаан хугацаанд маргаан өрнүүлж буй бөгөөд тус лэйбл тэдний нэр болон уран бүтээлүүдийг эзэмшдэг учраас хамтлагийнхан хамтдаа уран бүтээлээ цааш нь үргэлжлүүлэхийн тулд ийнхүү нэрээ өөрчилжээ.

Энэ талаар хамтлагийн гишүүн Ханни хэлэхдээ “бид энэ хүнд хэцүү цаг үеийг илүү гайхалтай зүйл болгон хувиргахыг хүссэн учраас хамтлагтаа шинэчлэл хийхээр шийдсэн” гэжээ.

Хамтлагийн шинэ нэрийг удаан хугацаанд нухацтай бодож, шүтэн бишрэгчдээсээ ч санал зөвлөгөө авсны дараагаар анхны нэртэйгээ төстэй, хоорондын учир холбогдолтой нэрийг сонгосон гэдгээ хамтлагийн гишүүн Ханни онцолсон байна.

Мөн тэрээр ADOR лэйблтэй хийж байгаа хэрүүл маргаан нь тэдний карьерт нөлөөлөхийг хүсэхгүй байгааг хэлж, “бид бүхнийг урьдын хэвийн байдалд эргүүлж оруулахын тулд чадах бүхнээ хийж байна” гэдгийг CNN агентлагт өгсөн ярилцлагадаа дурджээ.

NewJeans хамтлаг өнгөрсөн оны 11-р сард гэрээний үүргээ зөрчсөн гэх шалтгаанаар өөрсдийн харьяалагддаг ADOR лэйблийг буруутган, тус лэйблээс гарч байгаагаа албан ёсоор мэдэгдэж байсан.

Тухайн үед тэдний гэрээний хугацаа ч дуусч байгаа учраас цаашдаа NewJeans гэсэн нэрээрээ явахгүй гэдгээ мөн хэлж байсан билээ.

Ирэх сард тус хамтлаг Хонконгт зохиогдох ComplexCon хэмээх дуу хөгжмийн наадам, үзэсгэлэн яармагийн арга хэмжээний гол уран бүтээлчээр Metro Boomin, Zico нарын хамт оролцохоор болоод байгаа юм.

3 өдөр үргэлжлэх энэхүү томоохон арга хэмжээний өмнө ийнхүү хамтлаг нэрээ сольж, NJZ гэсэн шинэ нэрээрээ тус наадамд оролцох гэж байна.

Мөн эх сурвалжуудын мэдээлснээр NJZ хамтлаг ComplexCon наадмын тайзнаа өөрсдийн шинэ дуугаа анх удаа хүргэж, үзэгч сонсогчдын хүртээл болгоно гэжээ.

Тус хамтлагийн ADOR лэйблийн маргааны асуудлаарх шүүхийн урьдчилсан шатны сонсгол 3-р сард явагдаж, 4-р сард шүүхийн шийдвэр гарахаар товлогджээ.