Америкийн поп дуучин Sabrina Carpenter ирэх сарын эхээр зохиогдох Их Британийн дуу хөгжмийн салбарын хамгийн том шагнал гардуулах наадам “Brit Awards”-ын тайзнаа дуулахаар болсон талаар уг наадмыг зохион байгуулагчид мэдэгдлээ. Түүнчлэн дуучин Sabrina Carpenter энэ жилийн наадмын “Global Success” буюу “Дэлхийн амжилт” хэмээх төрөлд шагнал хүртэхээр болсныг давхар зарлажээ. Уг шагналыг дуу, уран бүтээл нь олон улсын хэмжээнд борлуулалтаараа тэргүүлсэн уран бүтээлчид олгодог. Энэ шагналыг өмнө нь “One Direction” хамтлаг, дуучин Ed Sheeran, Adele, Sam Smith нар хүртжээ.

Уг наадмыг зохион байгуулагчид дүрмэндээ өөрчлөлт оруулж, яг энэхүү төрөлд гадаадын уран бүтээлчдэд шагнал олгодог болгосон юм. Үүнээс хойш ийнхүү анх удаа Америкийн дуучин уг шагналыг хүртэх гэж байна. Sabrina Carpenter мөн “Brit Awards”-ын “Оны шилдэг олон улсын уран бүтээлч”, “Оны шилдэг олон улсын дуу” гэсэн төрөлд нэр дэвшин, өрсөлдөж байгаа ажээ.

2024 он Sabrina Carpenter Дэлхийн дуу хөгжмийн чартыг тэргүүлэн, ноёрхсон “үнэхээр гайхалтай жил” болж өнгөрсөн хэмээн “Brit Awards”-ыг зохион байгуулагчид онцолжээ. Тэрээр “UK Charts” буюу Британийн шилдэг дууны жагсаалтыг өнгөрсөн жил нийт 21 долоо хоног тэргүүлж, тус жагсаалтын эхний гурван байрыг “Taste”, “Please Please Please”, “Espresso” синглээрээ нэг дор эзэлсэн анхны эмэгтэй уран бүтээлчээр тодорсон юм.  

Энэ жилийн “Brit Awards” шагнал гардуулах ёслолын үеэр Sabrina Cerpenter-аас гадна дуучин JADE, Myles Smith, Shaboozey, Teddy Swims нар уран бүтээлээ хүргэхээр болсон байна. Харин Английн дуучин Charli XCX энэ жил хамгийн олон шагналд нэр дэвшсэн уран бүтээлчээр тодорсон. Тэрээр шилдэг поп, шилдэг дэнс, оны шилдэг уран бүтээлч, оны шилдэг дуу болон оны шилдэг цомог гэсэн 5 төрөлд нэр дэвшээд байгаа юм. Энэ жилийн наадамд мөн Английн хоёр томоохон рок хамтлаг болох “The Cure”, “The Beatles” хамтлаг олон жилийн дараа нэр дэвшиж байгаа нь онцлог үйл явдал болоод байна.   

“Brit Awards” шагнал гардуулах ёслолыг 3-р сарын 1-ний өдөр Лондон хотын “O2 Arena” цогцолборт зохион байгуулна.