Төв аймгийн Баян сумын 9 жилийн сургалттай сургууль 22 багш, 13 албан хаагч, 9 бүлэг 307 сурагчтай. 6 насны сурагчдын 80 хувь , суурь боловсрол эзэмших ёстой сурагчдын 85 хувь нь тус сургуульд сурч байна. Тус сургуульд сүүлийн 5 жилд сургууль завсардалт гараагүй. Бага ангийн багш, химийн багш дутуу байгаа аж.
2024 онд “Багш бүрд компьютер” хөтөлбөрийн хүрээнд улс, орон нутгийн 18,5 сая төгрөгөөр сургууль, цэцэрлэгийн багш нар зөөврийн компьютероор бүрэн хангагджээ.

Багш хөгжлийн төвдөө иж бүрэн тоног төхөөрөмж, өнгөт принтер, спортын хэрэглэгдэхүүн, таблет цэнэглэгч, сурагчийн локер шүүгээ зэргийг улсын төсвийн 42,2 сая төгрөгөөр авсан байна. Орон нутгийн хөгжлийн сангийн 2.6 тэрбум төгрөгөөр сургуулийн өргөтгөл, спорт заал, гал тогоо, хоолны заал барьжээ. Үүнийгээ ашиглалтад хүлээн авахад бэлэн болсон аж.
1974 онд ашиглалтад орсон одоогийн барилгынхаа сантехникийг шинэчлэх шаардлагатай байгааг тус сургуулийн захирал Г.Батсайхан аймгийн ИТХ-ын дарга тэргүүтэй төлөөлөгчдөд хэлжээ.