Израилын ерөнхий сайд Б.Нэтаньяху Хамас бүлэглэлийг төлөвлөсөн ёсоороо энэ бямба гарагт барьцааны хүмүүсийг суллахгүй бол энэ удаагийн гал зогсоох тохиролцоо дуусгавар болж, байлдааны ажиллагааг үргэлжлүүлэх болно хэмээн анхааруулгын шинжтэй мэдэгдлийг хийжээ.

Энэ долоо хоногийн эхээр Хамас бүлэглэлийн зүгээс барьцааны хүмүүсийг суллахаа түр хойшуулж буй талаараа мэдэгдэж, үүндээ Израилын талыг гал зогсоох тохиролцоог зөрчсөн хэмээн буруутгасны дараагаар ийнхүү Б.Нэтаньяху дээрх хариу мэдэгдлийг хийлээ. Мөн тэрээр Хамасын дээрх мэдэгдлийн дараа Израилын зэвсэгт хүчинд Газын бүсийн эргэн тойронд болон дотор цэргийн хүчээ бэлэн байдалд оруулахыг үүрэгдсэн юм.

Тэрээр мэдэгдэлдээ “бямба гарагийн үд гэхэд барьцааны хүн бүрийг суллахгүй бол Израилын арми дайн байлдааны үйл ажиллагааг эхлүүлж, Хамасыг бүрмөсөн ялан дийлэх болно” хэмээн Хамас бүлэглэлийг сүрдүүлжээ.

Б.Нэтаньяху мэдэгдэлдээ “барьцааны хүн бүрийг сулла” гэж шаардсан ч үлдсэн 76 хүнийг үү, эсвэл бямба гарагт суллаж солилцохоор төлөвлөсөн 3 барьцааны хүнийг хэлсэн үү гэдэг нь тодорхойгүй байна. Уг мэдэгдлийг мягмар гарагт 4 цагийн турш үргэлжлэн явагдсан Израилын аюулгүй байдлын кабинетын хуралдааны дараагаар Б.Нэтаньяху хийжээ.  

Мөн тэрээр АНУ-ын ерөнхийлөгч Д.Трампын “бүх барьцааны хүмүүсийг бямба гарагт суллахгүй бол Израил улс гал зогсоох тохиролцоог цуцлаж, нөхцөл байдал там болон хувирах болно” хэмээн хэлсэн шаардлагыг Израилын тал хүлээн авч, дэмжиж байгаагаа мэдэгдсэн байна.

Израилын ерөнхий сайдын сүрдүүлгийн шинжтэй мэдэгдэлтэй холбогдуулан Хамас бүлэглэл хариу мэдэгдэл хийж, үүндээ тус бүлэглэл Газын зурваст гал зогсоох тохиролцоог дагаж мөрдөх байгаа, харин Израилын тал л “тохиролцооны зүйл заалтыг зөрчсөн” хэмээн тодотгож, барьцааны хүмүүсийг суллах явдал хойшилж байгаа асуудлын хариуцлагыг Израил улс л хүлээх болно гэжээ.

Хамас бүлэглэлийн гал зогсоох тохиролцоог зөрчсөн хэмээн Израилын талыг буруутгасан мэдэгдлийг эндээс унших боломжтой.

1-р сарын 19-нөөс эхлэн үргэлжилж буй гал зогсоох тохиролцооны 6 долоо хоногийн хугацаатай эхний үе шатанд Хамас бүлэглэл нийт 33 барьцааны хүн суллах ёстойгоос 16-г нь суллаад байгаа бол Израилын тал ойролцоогоор 1900 палестины хоригдлыг суллах ёстойгоос одоогоор 550 гаруй хоригдлыг суллаад байгаа юм.