Дорноговь аймаг орон нутгийн төсвийн 1.2 тэрбум төгрөгөөр 2025 оноос төрийн өмчийн цэцэрлэгт “Сүү”, ерөнхий боловсролын сургуульд “Үдийн хоол” хөтөлбөр хэрэгжүүлж эхлээд байна.
Бага насны хүүхдүүдийн сүүний хоногийн хэрэгцээг хангах замаар эрүүл мэнд, өсөлт хөгжилд дэмжлэг үзүүлж, амьдралын зөв зохистой дадал хэвшилд сургах зорилгоор аймгийн хэмжээний төрийн өмчийн 33 хүүхдийн цэцэрлэгийн нийт 4407 хүүхдийг “Сүү” хөтөлбөрт хамруулж байна.
Мөн “Намайг хамгаал” нөлөөллийн аяны хүрээнд хүүхдүүдээс гарсан санал санаачилгыг дэмжин, хүүхдийн эрүүл мэнд, өсөлт хөгжлийн үзүүлэлт, судалгааг үндэслэн суралцагчдын уураг, амин дэмийн хэрэгцээг нэмэгдүүлэх, эрүүл аюулгүй, чанартай хоол хүнсээр хангах, суралцах анхаарал төвлөрлийг сайжруулах замаар сурлагын чанарт ахиц гаргах зорилгоор “Үдийн хоол” хөтөлбөрийг аймгийн хэмжээний ерөнхий боловсролын сургуулийн 6-9 дүгээр ангийн нийт 5720 сурагчийг хамруулж байна.