АНУ-ын Ерөнхийлөгч Д.Трамп Йорданы эзэн хаан Абдуллаг Цагаан ордонд мягмар гарагт хүлээн авч уулзлаа. Уулзалтын үеэр Д.Трамп “Палестинчуудыг өөр газар суурьшуулж, Газын зурваст АНУ хяналтаа тогтоох ёстой” хэмээх удаа дараа илэрхийлсэн байр сууриа дахин илэрхийлжээ.
Д.Трамп “Израил-Хамасын дайнд нэрвэгдэж, орон гэргүй болсон 2 сая гаруй палестинчуудыг Йордан гэх зэрэг ойр орчмын улс орнуудад байршуулж, Газын зурвасын бүс нутгийг АНУ урт хугацааны хяналтад авч, сэргээн босгоно. Үүний үр дүнд Ойрхи Дорнодод асар олон ажлын байр бий болно” хэмээн уг уулзалтын дараагаар мэдэгджээ.
Палестинчуудыг хөрш улс орнуудад байршуулах Д.Трампын санаачилгыг Ойрхи Дорнод дахь АНУ-ын гол түнш Йордан улс анхнаасаа хүлээж аваагүй, татгалзсан. Энэ уулзалтын үеэр ч Йорданы эзэн хаан Абдулла дээрх байр сууриа дахин илэрхийлсэн байна.
Гэхдээ Йорданы эзэн хаан хүмүүнлэгийн үүднээс яаралтай дэмжлэг, туслалцаа шаардлагатай байгаа палестинчуудад туслахад бэлэн байгаагаа илэрхийлсэн юм. Тэрээр “Яг бидний хийж чадах зүйл бол Газын зурвасын хүнд өвчтэй, хорт хавдартай 2000 хүүхдийг Йорданд яаралтай хүлээн авч, эрүүл мэндийн тусламж үзүүлэх боломжтой” гэжээ. Мөн Абдулла хаан палестинчуудыг хүлээж авах асуудлаарх Египет улсын санал санаачилга, төлөвлөгөөг хүлээж, сонсох болно гэдгээ хэлсэн юм. Египет ч мөн Йордантай ижил Д.Трампын санаачилгыг няцаасан. Газын зурвасыг сэргээн босгох урт хугацааны иж бүрэн төлөвлөгөө гаргах шаардлагатай байгааг даваа гарагт Египетийн ГХЯ мэдэгдсэн билээ.
Харин АНУ-ын Ерөнхийлөгч Д.Трамп уулзалтын дараагаар сэтгүүлчдэд хэлсэн үгэндээ палестинчуудыг өөр улс оронд байршуулж, Газын зурваст АНУ хяналтаа тогтоох тухай өөрийн байр суурин дээр бат зогсож, “Бид Газын зурвасыг авна. Бид эзэмшинэ. Бид сэргээх болно” гэжээ.
Йорданы эзэн хаан Абдулла АНУ-ын Ерөнхийлөгч Д.Трампын хоёр дахь бүрэн эрхийн хугацаа эхэлснээс хойш түүнтэй уулзсан гадаадын гурав дахь удирдагч болж байна. Түүний өмнө Д.Трамп Израилын Ерөнхий сайд Б.Нэтаньяху, Японы Ерөнхий сайд Ишиба Шигэрү нартай өнгөрсөн долоо хоногт уулзсан юм.