Малайз улсын шүүхээс аллагын хэргийн хохирогч болсон Монгол Улсын иргэн Ш.Алтантуяагийн ар гэрийнхэнд учирсан хохирлыг яаралтай барагдуулах шийдвэр гаргажээ. Шүүгч Сумати Муругиа 2-р сарын 12-ны өдөр Малайзын Засгийн газарт 30 хоногийн дотор Шаарийбуугийн Алтантуяагийн гэр бүлийн өмгөөлөгчийн дансанд 4.7 сая рингит буюу 5 тэрбум орчим төгрөгийн нөхөн олговор байршуулахыг тушаасан байна.

Мөн Малайзын Ерөнхий сайд асан Нажиб Разакийн зөвлөх асан Абдул Разак Багиндаг 4.7 сая рингитийг уг өмгөөлөгчийн дансанд байршуулахыг шүүхээс үүрэг болголоо. Ш.Алтантуяа агсан Абдул Разак Багиндатай амрагийн холбоотой байсан гэнэ. Түүнийг хөнөөсөн хэргийн шүүх хуралд оролцсон гэрчүүдийн мэдэгдсэнээр Ш.Алтантуяа 2002 онд Малайз улс Францын төрийн өмчит компаниас шумбагч онгоц худалдаж авах яриа хэлэлцээний үеэр А.Р.Багиндагийн орчуулагчаар ажиллаж байсан гэжээ.

Нажиб Разак тухайн үед Батлан хамгаалахын сайдаар ажиллаж байв. Тэр шумбагч онгоц худалдаж авах хоёр улсын гэрээг зуучилж байсан юм. Үүнтэй нь холбогдуулан түүнийг өдгөө хоёр улсын мөрдөх албаныхан авлигын хэргээр шалгаж байгаа билээ.

Ш.Алтантуяа агсан 2006 оны 10-р сард Малайзын нийслэл Куала-Лумпур хотын захын ойд буудуулан амиа алдсан юм. Түүний цогцсыг тэсрэх бөмбөг ашиглан дэлбэлснийг тогтоосон байдаг.

2022 онд энэхүү аллагын хэрэгт Малайзын Засгийн газар, Разак болон өмнө нь тус улсын нууц албанд алба хааж байсан Азила Хадри, Сирул Азар Умар хэмээх хоёр цагдааг буруутгаж, хариуцлагад татсан юм.

Дээрх хоёр цагдаад цаазын ял оноосон ч аллагын хэргийн сэдэл, шалтгааныг олон нийтэд зарлаагүй. Сирул Азар Умар Австрали руу оргон зайлсан. Малайз улс түүнийг цаазлах учраас Австрали улс түүнийг шилжүүлж өгөхгүй юм. Харин Азила Хадрид оноосон цаазын ялыг 2024 онд бүх насаар нь хорих ял болгож сольсон байдаг. Тэрээр 2019 онд “Ш.Алтантуяа агсныг хороох даалгаврыг надад Малайзын Ерөнхий сайд асан Нажиб Разак өгсөн” гэж мэдэгдсэн юм.

Нажиб Разак эрх мэдлээ урвуулан ашигласан, мөнгө угаасан гэх зэрэг хэд хэдэн хэргээр өдгөө шоронд ял эдэлж байгаа. Түүний ялыг өнгөрсөн жил нэг дахин багасгаж, 6 жил болгосон. Тэр ялынхаа үлдсэн хугацааг гэрийн хорионд эдлэхээр кампанит ажлыг эхлүүлээд байгаа ажээ.

Малайзын шүүхээс 2022 онд гаргасан шийдвэрийг тус улсын Засгийн газар болон Абдул Разак Багинда нар давж заалдаж байгаа. Ирэх 5-р сарын 19-ний өдөр явагдах давж заалдах шүүх хуралд Засгийн газар ялагдсан тохиолдолд өмгөөлөгчийн дансанд байршсан дээрх нөхөн олговор Ш.Алтантуяа агсны гэр бүлд очих ажээ.