Украины оролцоогүй тохиолдолд АНУ, ОХУ-ын зүгээс санал болгосон аливаа энхийн гэрээг Украин улс хүлээж авахгүй, байгуулахгүй гэдгийг тус улсын ерөнхийлөгч В.Зеленский анхааруулан мэдэгджээ.

Тэрээр Д.Трамп, В.Путин нар дайныг өндөрлүүлэх яриа хэлэлцээг явуулж эхлэхээр болсон талаар мэдэгсэний дараа ийнхүү байр сууриа илэрхийлжээ.

“Тусгаар тогтносон улсын хувьд бид үүнийг хүлээн зөвшөөрч чадахгүй” хэмээн В.Зеленскийн хэлсэн байна.

Д.Трамп болон түүний засаг захиргаа Украиныг НАТО-д элсүүлэхгүй гэсэн байр суурьтай, мөн Оросын эзлэн авсан газар нутгийг Украинд буцааж өгөх магадлал тун бага болоод байгаа юм.

АНУ-ын ерөнхийлөгч мөн 14-ний баасан гарагт ХБНГУ-ын Мюнхен хотноо зохиогдох аюулгүй байдлын бага хурлын үеэр Украины дайны энхийн яриа хэлэлцээний асуудлаар Орос, Америкийн дипломат төлөөлөгчид уулзана гэдгийг мэдэгдсэн. “Украины талыг ч мөн урьсан, Мюнхены бага хуралд яг ямар төлөөлөгчид ирж оролцохыг сайн мэдэхгүй ч тэнд Орос, Украин, Америкаас өндөр дээд түвшний хүмүүс ирж оролцох болно” хэмээн Д.Трамп мэдэгджээ.

Харин Мюнхены бага хуралд оролцоно гэж мэдэгдээгүй ОХУ-ын зүгээс Трампын энэхүү мэдэгдлийн талаар ямар нэгэн хариу хийгээгүй байсаар байна.

Украины ерөнхийлөгчийн зөвлөх Дмитро Литвин сэтгүүлчдэд хийсэн мэдэгдэлдээ Мюнхены бага хуралд Оросын талтай яриа хэлэлцээ явуулна гэж төлөвлөөгүй гэжээ. Харин Мюнхены бага хурлын хүрээнд Украины ерөнхийлөгч В.Зеленский АНУ-ын дэд ерөнхийлөгч ЖД Вэнстэй уулзахаар болсон юм. Мюнхены аюулгүй байдлын 61 дэх бага хурал энэ сарын 14-16-ны өдрүүдэд Мюнхенд болно.

Энхийн яриа хэлэлцээнд Украин улс оролцох ёстой хэмээн байр сууриа илэрхийлсэн В.Зеленский мөн хэлэлцээний ширээний ард Европын тал ч суух ёстой гэдгийг тодотгож, Украинд аюулгүй байдлын баталгаа гаргаж өгөх нь хамгийн чухал, нэн тэргүүний асуудал гэдгийг Д.Трамптай утсаар ярилцахдаа чухалчилсан гэдгээ онцолсон байна. Мөн тэрээр олон улсын удирдагчдад дайныг өндөрлүүлэхэд бэлэн байгаа хэмээн мэдэгдэж байгаа В.Путинд итгэх хэрэггүй гэдгийг анхааруулсан, Украин НАТО-д гишүүнээр элсэж орох явдал нь бүх оролцогч талуудын хувьд “хамгийн үр дүнтэй” хувилбар байх болно гэдгийг нэмж хэлжээ.

Зеленскийн нэгэн адил энхийн яриа хэлэлцээ Украин улсгүйгээр явагдах ёсгүй гэдгийг Украин улсын Европын түнш улс орнууд мөн илэрхийллээ. Их Британийн батлан хамгаалахын төрийн нарийн бичгийн дарга Жон Хийли “Украины асуудлаар Украины оролцоогүй яриа хэлэлцээ байх боломжгүй, Украины дуу хоолой ямар ч яриа хэлэлцээний гол төвд байх ёстой” гэсэн бол ХБНГУ-ын Канцлер Олаф Шольц “дарангуйлагчдын энхийн гэрээг” эсэргүүцэж байгаагаа илэрхийлжээ. Түүнчлэн Германы батлан хамгаалахын сайд Кремльд аль хэдийн “буулт хийгээд байгаа” Вашингтонд “харамсаж” байна гэжээ. ЕХ-ны гадаад бодлогын дарга Кая Каллас Вашингтоныг Орос улсад ая тал засч байна хэмээн буруутгажээ.

Д.Трампын хувьд лхагва гарагт В.Путин, В.Зеленский нартай утсаар холбогдон ярилцсан бөгөөд В.Путинтэй Саудын Араб улсад уулзана гэж хэлсэн юм. Мөн тэрээр В.Путин дайныг өндөрлүүлэхийг хүсэж байгаа, тэр удахгүй гал зогсоох болно гэж лхагва гарагт Цагаан ордны Зууван танхимд сэтгүүлчдэд мэдэгдсэн бол “Энхийн яриа хэлэлцээнд Украин эн тэнцүү, тэгш эрхтэй юу?” гэсэн асуултанд “Тэд эвлэрэх ёстой” хэмээн хариулцсан билээ.