Японы Honda болон Nissan компаниудыг нэгтгэх асуудал бүтэлгүйтсэн байна. Олон улсын цахилгаан автомашины зах зээлд тэргүүлэгч Америк, Хятадын эсрэг өрсөлдөх зорилгоор бизнесүүдээ нэгтгэж, үүндээс мөн Mitsubishi компанийг багтаан оруулж, олон тэрбум ам.долларын гэрээ байгуулахаар 3 сар гаруй хугацаанд үргэлжилсэн яриа хэлэлцээ ийнхүү үр дүнд хүрэлгүй нуран унажээ.

Хэрвээ Японы автомашины компаниуд нэгдсэн бол 60 тэрбум ам.долларын үнэлгээ бүхий авто групп үүсэн бий болж, автомашин борлуулалтын тоо хэмжээгээрээ Toyota, Volkswagen, Hyundai компаниудын араас дэлхийд 4-т бичигдэх томоохон групп болох байсан юм.

Яриа хэлэлцээнд Honda компани тэргүүлэх байр суурьтай оролцсон бол сүүлийн үед борлуулалт нь буураад байгаа Nissan компанийн хувьд нэгдэх асуудал маш чухал байсан боловч талууд нэгдсэний дараах Nissan компанийн байр суурь, гүйцэтгэх үүрэг дээр (тэгш эрхтэй хамтрагч, эсвэл охин компани) нэгдсэн тохиролцоонд хүрч чадаагүйн улмаас яриа хэлэлцээ бүтэлгүйтсэн байна.

Хэдийгээр нэгтгэх яриа хэлэлцээ ийнхүү амжилтгүй өндөрлөсөн боловч Honda, Nissan компаниуд цахилгаан автомашины үйлдвэрлэлд хамтын ажиллагаагаа үргэлжлүүлэх болно гэдгээ мэдэгджээ.