Өнгөрсөн бямба гарагт ХБНГУ-д зохиогдсон Мюнхены аюулгүй байдлын бага хурлын үеэр “Их долоо”-гийн бүлгийн Гадаад хэргийн сайд нар Украинд урт хугацааны энх тайван байдлыг цогцлоохын төлөө хамтран ажиллах амлалт өгч, санал нэгдсэн байна.

“Их долоо”-гийн Гадаад хэргийн сайд нарын түвшний энэ удаагийн уулзалт АНУ-ын Ерөнхийлөгч Д.Трамп тангараг өргөж, албандаа орсноос хойших анхны уулзалт боллоо. Уулзалтын үеэр Гадаад хэргийн сайд нар Украин, Ойрхи Дорнод, Энэтхэг-Номхон далайн бүс нутгийн тулгамдсан асуудлуудаар байр сууриа солилцлоо.

Хэлэлцээний дараагаар гаргасан хамтарсан мэдэгдэлд “Их долоо”-гийн бүлгийн гишүүн орнууд Украинд урт хугацааны энх тайван байдал тогтоож, хөгжин цэцэглэхэд нь дэмжлэг туслалцаа үзүүлнэ гэдгээ онцолжээ. Түүнчлэн тухайн бүс нутагт ахин дайн дажин дэгдээхгүйн тулд аюулгүй байдлын баталгаа бий болгох шаардлагатай гэдгийг дахин баталлаа.

Хамтарсан мэдэгдэлд “ОХУ-ын эсрэг шинэ, нэмэлт хориг арга хэмжээ авах эсэх нь Москва дайныг эцэслэн зогсоож, Украиныг бүрэн эрхт, тусгаар тогтносон улсын хувьд урт хугацааны аюулгүй байдал, тогтвортой байдлыг хангахын тулд хэр бодитой, сайн санааны хүчин чармайлт гаргаж байгаагаас шалтгаалах болно” гэжээ.

“Их долоо”-гийн зүгээс мөн Оросын талд хоёрдмол байдлаар тусламж үзүүлж байгаа Хятад улс  болон цэрэг зэвсгийн дэмжлэг үзүүлсээр байгаа БНАСАУ, Иран улсыг буруушааж байгаагаа мэдэгдсэн байна.

“Их долоо”-гийн Гадаад хэргийн сайд нарын Оросын түрэмгий дайны талаарх хэлэлцээнд Украины гадаад хэргийн сайд Андрей Сибига оролцсон байна.