Улсын дээд шүүхийн Эрүүгийн хэргийн танхимын бүх шүүгч 2 дугаар сарын 17-ны өдөр хуралдаж, С.Цэцэгээ, М.Ганжуур нарт холбогдох хэргийг шүүгдэгч М.Ганжуурын өмгөөлөгч С.Ичинхорлоо, шүүгдэгч С.Цэцэгээгийн өмгөөлөгч Д.Нарангэрэл, Л.Түвшинцэнгэл нарын хамтран гаргасан гомдлын дагуу хянан хэлэлцлээ. С.Цэцэгээ, М.Ганжуур нар Эрүүгийн хуулийн тусгай ангийн 10.6 дугаар зүйлийн 1 дэх хэсэг “Хууль, түүнд нийцүүлэн гаргасан захиргааны хэм хэмжээний акт, хэлцлээр хүлээсэн үүргээ биелүүлээгүй, эсхүл бусад болгоомжгүй үйлдэл, эс үйлдэхүйн улмаас хүний амь насыг хохироосон…” гэмт хэрэгт холбогдсон юм. 
Нийслэлийн Баянгол дүүргийн 18-р хорооны 86-р байрны 7-р давхраас 2022 онд цахилгаан шат унаж, 3 настай хүүхэд амиа алдсан. Уг шатыг ашиглах боломжгүй болсон ч бусдад аюулгүй болгоогүй байсны улмаас хүүхэд амиа алдсан болохыг цагдаагийн байгууллага мөрдөн шалгалтаар тогтоосон байдаг. Уг шатыг ашиглах боломжгүй гэдэг дүгнэлтийг осол гарахаас өмнө мэргэжлийн хяналтынхан тогтоосон байв. Ийм аюултай шатыг хүүхэд мэдэхгүй хаалгыг нь налаад, хонгол руу нь унасан юм.
Ингээд уг шатыг хариуцах ёстой “Хаан суудал” СӨХ-ны ТУЗ-ийн дарга С.Цэцэгээ, гүйцэтгэх захирал М.Ганжуур нарт Баянгол дүүргийн Цагдаагийн хэлтэс эрүүгийн хэрэг үүсгэж, яллагдагчаар татсан юм.
Тэдний хэргийг Баянгол дүүргийн Эрүүгийн хэргийн анхан шатны шүүх 2024 оны 10-р сард хэлэлцээд, С.Цэцэгээд 1.6 жил, М.Ганжуурт 1 жил хорих ял оноон, 88 сая төгрөг хуваан гаргуулж, хохирогчийн ар гэрт олгуулахаар шийдвэрлэсэн юм. Үүнийг тэд эсэргүүцэн, давж заалджээ. Нийслэлийн Эрүүгийн хэргийн давж заалдах шатны шүүх С.Цэцэгээгийн ялаас 6 сар хасан, 1 жил болгож багасгасан ч зөвшөөрөлгүй, хяналтын шатны шүүхэд ханджээ.

Ингээд УДШ-ийн Эрүүгийн хэргийн танхим шүүгдэгч С.Цэцгээ, М.Ганжуур нарын өмгөөлөгчдийн бичсэн гомдол нь Эрүүгийн хэрэг хянан шийдвэрлэх тухай хуулийн 40.1 дүгээр зүйлийн 1 дэх хэсэгт заасан шүүхийн хууль хэрэглээний зөрүүг арилгах; Эрүүгийн хэрэг хянан шийдвэрлэх тухай хуулийг ноцтой зөрчсөн нь шүүхийн шийдвэрт нөлөөлсөн; хуулийг Улсын дээд шүүхийн тогтоол, тайлбараас өөрөөр хэрэглэсэн; эрх зүйн шинэ ойлголт, эсхүл хууль хэрэглээг тогтооход зарчмын хувьд нийтлэг ач холбогдолтой зэрэг үндэслэлд хамаарахгүй гэж үзэв. Ингээд энэ хэргийг хяналтын шатны шүүх хурлаар хэлэлцүүлэхээс татгалзжээ. Ийн дээрх хүмүүст давж заалдах шатны шүүхээс оноосон 1 жил хорих ял хэвээр үлдлээ.