Монгол Улсад ОХУ-ын Ерөнхийлөгч В.В.Путины 2024 оны 9-р сард хийсэн албан айлчлалын үеэр хоёр орны Байгаль орчны сайд нар “Байгал нуур болон Сэлэнгэ мөрнийг хамгаалах салбарт хамтран ажиллах тухай” санамж бичигт гарын үсэг зурсан. Тус санамж бичгийн хүрээнд Эг голын УЦС төслийн Байгал нуур, Сэлэнгэ мөрөнд үзүүлж болзошгүй нөлөөг үнэлэх Монгол-Оросын мэргэжлийн баг байгуулсан юм. Уг баг анхны хурлаа 2025 оны 2-р сарын 10-ны өдөр Москва хотод ОХУ-ын ШУА-ийн төв байранд хийв.
Хурлын эхний хэсэгт “Эг голын усан цахилгаан станц” төсөлтэй холбоотой өнгөрсөн хугацаанд хийсэн байгаль орчны судалгаануудын үр дүнг ажлын хэсгийн гишүүд хэлэлцэн, холбогдох мэдээллүүдийг харилцан солилцож, илтгэл тавьжээ. Цаашид зайлшгүй хийх шаардлагатай байгаа байгаль орчин, нийгмийн нөлөөллийн судалгааны хүрээг тодорхойлж, хамтран гүйцэтгэж улмаар хоёр орны сайд нарын баталсан ажлын төлөвлөгөөний дагуу судалгааны үр дүнг 2026 оны эхний хагаст Монгол Улсын Засгийн газарт өргөн мэдүүлэхээр тохирлоо. Хурлын төгсгөлд талууд “Эг голын УЦС төсөл”-ийн Сэлэнгэ мөрөн, Байгал нуурт үзүүлж болзошгүй нөлөөг үнэлэх хоёр орны судлаачдаас бүрдсэн мэргэжлийн баг бий болж, анх удаа уулзаж, асуудлууд дээр санал нэгдэж байгаа нь уг төслийг амжилттай хэрэгжүүлэх үндэс болохыг тэмдэглэж, зайлшгүй хийх шаардлагатай байгаа байгаль орчин, нийгмийн нөлөөллийн судалгааны ажлыг ойрын хугацаанд хийж дуусгахыг зорилго болгохоо мэдэгдлээ. Мөн төлөвлөгөөт ажлыг цаг хугацаанд нь гүйцэтгэхэд шаардагдах санхүүжилтийг нэн яаралтай шийдвэрлэхгүй бол төслийг бүтээн байгуулалтын ажил удааширч болохыг төр, засгийн холбогдох байгууллага, удирдлагад уламжлах нь зүйтэй гэж тохиров.
Хуралдааны үеэр ОХУ-ын ШУА-ийны ерөнхийлөгч Г.Я.Красников, дэд ерөнхийлөгч В.Я.Панченко нар Монгол Улсын ШУА-ийн ерөнхийлөгч С.Дэмбэрэлийг хүлээн авч уулзан, Дэлхийн хосгүй гайхамшигт өвөөр бүртгэгдсэн Байгал нуур болон Сэлэнгэ мөрний тогтвортой менежментийн чиглэлээр хамтран ажиллах, төслийг эхлүүлэх тал дээр ОХУ-аас онцгой ач холбогдол өгч, анхаарч буйгаа илэрхийлсэн юм.
Эг голын усан цахилгаан станцын төслийн Сэлэнгэ мөрөн, Байгал нуурт үзүүлж болзошгүй нөлөөг үнэлэх Монгол, Оросын мэргэжлийн багийн анхны хуралд дараах төлөөллүүд оролцсон байна. Үүнд:
Монголын талаас – Академич С.Дэмбэрэл ахлагчтай Байгаль орчин, уур амьсгалын өөрчлөлтийн яам, Эрчим хүчний яам, Шинжлэх ухааны академи, “Эг голын усан цахилгаан станц” ТӨХХК-ийн төлөөллөөс бүрдэх 11 гишүүн;
Оросын талаас – Академич М.В. Болгов ахлагчтай Байгалийн нөөц, экологийн яам, Гадаад хэргийн яам, Шинжлэх ухааны академийн төлөөллөөс бүрдэх 24 гишүүн багтжээ.