Сар шинийн баяраар улс даяар шинийн 1, 2-ны өдрүүдэд амарна. Энэ нь амралтын өдөр таарч байгаа юм. Улмаар шинийн 4 буюу гуравдугаар сарын 3-наас ажлын өдрүүд эхэлнэ. Үүнд олон нийт бухимдаж байна.

Үндэсний уламжлалт баяраараа аав, ээж, настан буурлууддаа очиж золгодог учраас хол замд явах хүмүүст амралтын хоёр өдөр хангалтгүй байгаа аж. Тиймээс Цагаан сарын тэмдэглэлт баяраар амрах өдрийг олон болгох ёстой гэдэг санал ч гарч эхэлсэн. Тэгвэл зарим их, дээд сургууль орон нутгийн оюутнуудад боломж олгох үүднээс Сар шинийн өдрүүдийн хичээлийг цахимаар орох шийдвэр гаргажээ.

Тухайлбал: МУИС-ийн Оюутны холбоо, Оюутан конгрессоос 2 дугаар сарын 21, 24-ний өдөр ирүүлсэн албан хүсэлт, төрийн өмчит их сургуулиудын хичээл зохион байгуулалтын нийтлэг шийдвэрийн хүрээнд 2 дугаар сарын 28 /Сар шинийн битүүн/, 3 дугаар сарын 3, 4-ний /Шинийн 4, 5/ өдрүүдийн хичээлийг цахимаар зохион байгуулах шийдвэр гаргасан байна.