Өнгөрсөн долоо хоногт Архангай аймагт зохион байгуулсан хурдан морины сунгааны үеэр бага насны хүүхэд мориноосоо унаж, амиа алдсан. Энэ талаар цагдаагийн байгууллагаас тодруулахад “Мориноос унаж нас барсан хүүхэд 2025 оны 2-р сарын 19-ний өдрийн 16:00 цагийн орчимд Архангай аймгийн Хайрхан сумын эмнэлэгт ирлээ гэх мэдээлэл бүртгэгдсэн. Хохирогч нь 12 настай, эрэгтэй С гэх хүүхэд байсан. Тухайн өдөр хашаан дотроо ганцаараа морь унаж байгаад унаж, чирэгдсэн байж болзошгүй нөхцөл байдал тогтоогдсон” гэх тайлбар өгсөн юм.

Тэгвэл Архангай аймагт 5 дугаар сарын 1 хүртэл хурдан морины уралдаан, үсэргээ, сунгаа зохион байгуулахааргүй болжээ. Хүүхдийн эрхийг хамгаалах чиглэлээр 5 дугаар сарын 1-ний өдрийг хүртэлх хугацаанд хурдан морины уралдаан, үсэргээ, сунгаа зохион байгуулахгүй байх Засгийн газрын тогтоол, аймгийн засаг даргын захирамжийн хэрэгжилтийг хангаж, ажлыг эрчимжүүлэх талаар Архангай аймгийн зЗсаг дарга Б.Цэрэннадмид, Цагдаагийн газрын дарга О.Түмэнбаяр, Хүүхэд, гэр бүлийн хөгжил хамгааллын газрын дарга Б.Болормаа нар 19 сумын засаг дарга, тамгын дарга, сургуулийн захирал, нийгмийн ажилтан, хэсгийн төлөөлөгч, сумдын нийгмийн ажилтан, хүүхэд, гэр бүлийн нийгмийн ажилтнуудыг хамруулан цахим хурал хийжээ.

Цахим хурлаар:

• Засгийн газрын тогтоол, аймгийн засаг даргын захирамжийг хэрэгжүүлж, хяналтыг сайжруулах,
• Иргэд олон нийтэд мэдээлэл хүргэж, урьдчилан сэргийлэх ажлыг зохион байгуулах үүрэг, чиглэл өгсөн байна.