“Мөрөөдлийн театр”-ын хамт олон “Самсара” нэртэй шинэ драмын жүжгээ олон нийтэд толилуулахаар бэлтгэлдээ гарчээ. Тэр бүр хэвлэлд гараад байдаггүй өдрийн од шиг ховор үзэгддэг жүжигчин Ц.Алдармаатай ярилцахаар гурав хоног хөөцөлдсөний эцэст цаг тохирч чадсан юм. Тэрээр амаржаад удаагүй, нялх хүүхэдтэй учраас бэлтгэлийн цаг, хувийн ажлынх нь дундуур сая нэг уулзах завшаан гарав. Хар өнгийн Hoodie, урт жинсэн юбка хослуулан донжтой хувцасласан Ц.Алдармаа жүжгийн бэлтгэлдээ ирээд буй нь энэ.

– Сүүлийн үед ямар уран бүтээл туурвиж байна вэ?

Манай хамтлаг шинэ уран бүтээл “Самсара” драмын жүжгээ гуравдугаар сарын 5-наас эхлээд, Соёлын төв өргөөний тайзнаа өдөр бүр тоглоно. Шинэ уран бүтээлдээ бэлтгээд явж байна.

– Та “Самсара” жүжигт ямар дүр бүтээж байгаа вэ? Жүжгийнхээ талаар дэлгэрэнгүй хуваалцаач.

“Самсара” жүжгийн маань зохиол маш сонирхолтой. Зохиолоо анх уншиж байхад, маш гоё санагдсан. Миний хувьд дүр бүтээх гэхээс илүү рольд тоглож байгаа. Үзэгчид та бүхнийг ирээд сонирхох байх гэж бодож байна.

– Та хэсэг хугацааны дараа салбартаа эргэн ирсэн шүү дээ. Тэр хугацаанд тайзаа их санав уу? Өнгөрсөн жил “Тод хувцастай эмэгтэй” драмын жүжигт тоглосон.

Тайзан дээр гараагүй удсан юм биш ээ. Би ажлаа хийгээд явж л байгаа шүү. Кино уран бүтээлдээ ажиллаад л явж буй (инээв). Ингээд дараагийн уран бүтээл болох “Самсара” жүжгийнхээ бэлтгэлд орчихсон явж байна.

    “Тод хувцастай эмэгтэй” драмын жүжиг маань өнгөрсөн жилийн өдийд нээлтээ хийжсэн. Үзэгчид бүгд ам сайтай, ирж үзсэн. Манай театр хөдөө болон гадагшаа нэг жүжгээ тоглохоор явдаг. Яг энэ зарчмаар ажиллаж байгаа даа.

–Та “Эхиймаа” буюу анхны бие даасан киногоо 2020 онд хийж, үзэгчдэд хүргэсэн. Үзэгчид сайн, муу хоёр талын л байр суурьтай байсан. Кино хийсэн уран бүтээлч танд тэр шүүмжлэл, санал сэтгэгдэл хэр нөлөөлсөн бэ?

Ковидын дараа “Эхиймаа” кино маань үзэгчдийн хүртээл болсон. Хүмүүс сайн үзсэн. Мэдээж санал, сэтгэгдэл, шүүмжлэл ирдэг. Гэхдээ би хүн үнэлж, дүгнэх хэмжээний арай болоогүй. Хүн хүний харах өнцөг өөр. Янз бүрийн зүйл ярьдаг. Гэхдээ тэр болгонд анхаарлаа хандуулаад, айгаад ч юм уу эсвэл өөр юм боддоггүй. Би үүн дээр нэг их зүйл бодоогүй юм байна.

–Та “Улаан бал” нэвтрүүлэгт орох үеэрээ “Амьдралаа төлөвлөдөггүй” гэж ярьж байсан.

Одоо ч төлөвлөөгүй явж байна.

–Яагаад амьдралаа төлөвлөдөггүй юм бэ? Их сонин санагдаж байна л даа.

Төлөвлөж яах юм бэ (инээв). Би зүгээр л нэг их төлөвлөдөггүй юм. Бусад хүнд тэнэг юм шиг санагдах байх л даа. Гэхдээ надад бол зүгээр, болдог юм. Болох ёстой юм болдог гэж боддог. Гэхдээ маргаашийн ч зорилгогүй амьдарна гэж байхгүй л дээ. Хүмүүс том зургаар амьдралаа төлөвлөдөг бол би тэр талаас төлөвлөдөг хүн биш. Яах вэ, долоо хоногийн, сарын хугацаанд хийх зүйлээ төлөвлөдөг л дөө.

–Хүмүүс таныг өнгөрсөнд болсон зүйлээс болж, сайн, муугаар их ярьсан. Тэр үеийг хэрхэн даван туулав?

Тэр үйл явдал болж өнгөрөөд удаж байгаа шүү дээ. Өнгөрсөн юм өнгөрсөндөө үлдэх ёстой. Хүн юм чинь амьдарна шүү дээ. Амьдрал заавартайгаа ирдэг биш дээ гэдэгчлэн бидний амьдралд юу ч тохиолдож магадгүй. Цаг хугацаа бүхнийг эдгээдэг байх. Цаг хугацаа өнгөрсөөр байна. Миний хувьд эдгэчихсэн л явж байгаа байх. Өнгөрсөн зүйл гэж хэлэхийг бодоход.

–Урлагийн хүн ар гэрийн ажлаа хэрхэн зохицуулж авч явж байна вэ? Саяхан амаржиж ээж болсон. Тоглолтын бэлтгэл, кино гээд нэлээн амаргүй л байгаа байх.

Яг л бусдын адилаар. Зохицуулах үедээ зохицуулна. Амжихгүй үедээ энэ уран бүтээлд оролцож чадахгүй нь ээ гэдгээ хэлнэ. Гэхдээ аль болох ажил, амьдралаа зохицуулах гээд явж байгаа нэгэн ээж байна.

–Танд шинэ уран бүтээлийн санал ирэх үед юун дээр илүү анхаардаг вэ? Кино зохиолоо илүү хардаг уу эсвэл найруулагч нь хэн бэ гэдгийг анхаардаг уу?

Уран бүтээлч хүний хувьд миний нэг номерын ажил бол “Мөрөөдлийн театр”-ын ажил. Бид баг хамт олон болоод нэлээн хэдэн жилийг ардаа үдлээ. Миний нэг дэх ажил бол энэ. “Мөрөөдлийн театр” маань тоглолтын бэлтгэлтэй байвал би давхар кинонд орж амжихгүй шүү дээ. Би ямар “Harry Potter” биш дээ (инээв). Одоо миний нэг номерын ажил маань эхэлчихсэн явж байгаа учраас тоглолтдоо бэлдээд байж байна. Уран бүтээлч хүний хувьд шинэ уран бүтээлийн санал дээр баг, хамт олныг илүү хардаг юм шиг санагддаг.

–Та “Фантастик” продакшны уран бүтээлд дүр бүтээж байсан. Бүтээхийг хүсдэг дүр жүжигчин бүрд л байдаг. Танд тийм дүр байдаг уу?

Миний хувьд тоглож үзэх юм сан, тийм дүр бүтээх юм сан гэхээс илүү баг хамт олон ямар байхаас шалтгаалж, уран бүтээлд ордог гэж боддог. “Фантастик”-ийнхан, найзуудтайгаа ажиллахад бүх юм 100% амар байдаг. Яг өөрөөрөө байж чаддаг. Бүгд санаа, бодлоо хуваалцаж, уран бүтээлээ хийдэг. Хамтарч ажиллахад гоё хүмүүс гэж байдаг шүү дээ. Гоё дүр гэхээс илүү баг, хамт олон нэг цул болж байж, бие биеэ ойлговол гоё уран бүтээл гардаг гэж боддог.

–Одоо нээлтээ хийх “Самсара” жүжгийн талаар дахин ярья. “Мөрөөдлийн театр” хошин урлагаас гадна маш олон драмын жүжиг толилуулсан. Энэ удаагийн жүжиг ямар онцлогтой вэ?

Манай театр 2018 оноос драмын чиглэл рүү уран бүтээл туурвиж эхэлсэн. “Дундын бүсгүй”, “Галзуу хот” гээд драмын жүжгүүдээ тайзнаа тавьсан. Хошин урлагийн чиглэлээр тайзан дээр гараагүй удсан байна. Гэхдээ бүгдээрээ дуртай. “Буцаад хошин урлагийн номер гаргаад тоглох юм сан” гэж ярьдаг ч гэсэн бидний одоогийн зорилго бол жүжиг.

Энэ удаагийн жүжиг маань “Самсара” гээд нэрээсээ эхлээд өвөрмөц. Ямар сонин нэр вэ гээд “Google” –ээр хайж үзсэн байх. Бүрэн бүрэлдэхүүнээрээ энэ жүжиг дээр ажиллаж байна. Манай жүжгийг үзэхээр ирээд хүмүүс их гайхах байх. Энэ амьдралд дурлаж амьдрах байх. Магадгүй над шиг юу ч төлөвлөдөггүй хүн төлөвлөх ёстой юм уу гэж гаднаас өөрийгөө харах ч юм уу, тийм байна байх. Хүн уран бүтээл үзээд, нэг бодрол эсвэл өөр зүйл тээгээд гардаг шиг яг тийм зүйлийг мэдрээд гараасай гэж хүсэж байгаа. Хамгийн том шүүлт үзэгчдийнх байдаг. Бидний хувьд жүжгээ гоёор харж буй. Найруулга, тайз, хувцас гээд. Ер нь маш өөр жүжиг. Гэхдээ одоохондоо нууц.

–Олны хэл аманд орсноос хойш Ц.Алдармаа хувийн амьдралдаа илүү анхаарлаа хандуулаад байх шиг санагдсан. Нам жим болсон гэх юм уу?

Миний хувь хүн угаасаа л дуу цөөтэй. Одоо ийм болчхоод байгаа хэрэг биш л дээ. Фейсбүүк, цахим сүлжээнд идэвхтэй биш. Зүгээр оршиж байдаг ч хүн байж магадгүй. Хүн хүнийг муугаар хармаар байвал муугаар л харна. Сайн болгож харъя гэвэл сайнаар л харна. Хүмүүсийн юу гэж ярьж байгаад нэг их ач холбогдол өгдөггүй.

–Ярилцсанд баярлалаа. Шинэ уран бүтээлд нь амжилт хүсье.

Танай хамт олонд баярлалаа.