Монгол Улсын хэмжээнд халдварт болон халдварт бус өвчлөлийн чиглэлээр олон эх үүсвэрээс тандалт хийж, нийгмийн эрүүл мэндийн өргөн хүрээний эрсдлийг хурдан илрүүлж, шийдвэр гаргагчид болон бусад оролцогч талуудыг шуурхай мэдээллээр ханган, хариу арга хэмжээг төлөвлөж, удирдахад туслах чиг үүрэг бүхий “Нийгмийн эрүүл мэндийн ноцтой байдлын үеийн шуурхай удирдлагын төв”-ийг Эрүүл мэндийн яаман дээр байгуулж, албан ёсны нээлтийг хийлээ.

Эрүүл мэндийн яамнаас Дэлхийн эрүүл мэндийн байгууллагатай хамтран тус төвийг байгуулж буй бөгөөд шаардлагатай санхүүжилтийг Дэлхийн банкны санаачлага болох Цартахлын сангаас шийдвэрлэсэн юм. Үүнтэй холбогдуулан Дэлхийн банк, түүний түншлэгч нарт Эрүүл мэндийн сайд Т.Мөнхсайхан нээлтийн үеэр талархлаа илэрхийлэв. Тэрбээр нийгмийн эрүүл мэндийн ноцтой байдалд бэлэн байх, хариу арга хэмжээ авах, олон салбарын зохицуулалтыг хангах зэрэг Олон улсын эрүүл мэндийн дүрмээр хүлээсэн үндсэн чадавхиудаа Монгол Улс сайжруулахад энэ төвийн үйл ажиллагаа чухал ач холбогдолтой болохыг онцлов.

Төв нь тайван цагт нийгмийн эрүүл мэндийн ноцтой байдал гарахаас сэргийлэх, өвчлөлийн мэдээ, мэдээллийг солилцох, тандалт судалгааг хийх үүрэгтэйгээр ажиллана. Энэ чиг үүргийн хүрээнд бодлого боловсруулагчид болон шийдвэр гаргагч нарт шаардлагатай дата мэдээлийг нэг урсгалаар хангахад энэ төв туслах юм.