Японы автомашин үйлдвэрлэлийн тэргүүлэгч Toyota Motor компанийн нийслэл Токио хотоос баруун өмнө зүгт барьж байгуулж байгаа орчин үеийн технологид суурилсан футуристик хотын барилгын ажлын эхний үе шат дууссан тухайгаа мэдээлжээ.

Компанийн зүгээс уг ирээдүйн хотыг “Woven City” буюу “Сүлжмэл хот” хэмээн нэрлэсэн байна.

Япон улсын Шизүока мужийн Сусоно хот дотор баригдаж байгаа, уг жижиг хот нь нийт 700 мянган шоо дөрвөлжин метр талбай газрыг хамран баригдаж байгаа бөгөөд Toyota Motor компани энэхүү хотын барилгын ажлыг 2021 онд анх эхлүүлж байсан юм.

Toyota компанийн зүгээс энэхүү шинэ хотын оршин суугчид жолоочгүй автомашин, цахилгаан дугуй, скүүтер гэх зэрэг төрөл бүрийн тээврийн хэрэгслээр зорчих боломжтой байдлаар бүтээгдэж байгааг онцолжээ.

Түүнчлэн аливаа хүргэлт болон хог цуглуулахад зориулагдсан газар доогуурх тусгай зам, хонгилуудтайгаас гадна мөн тус футуристик хотод орчин үеийн дэвшилтэт цахим технологи, роботууд зэргийг ч давхар ашиглах ажээ.

Энэ оны 1-р сард АНУ-ын Лас Вегас хотноо зохиогдсон CES 2025 үзэсгэлэн яармагийн арга хэмжээний үеэр Toyota компанийн зүгээс мэдэгдэхдээ ирэх зун 360 хүн тус хотод нүүж ирж амьдарч эхлэх бөгөөд үүнд компанийн удирдлагууд, ажилтнууд, эрдэмтэн судлаачид, мэргэжилтнүүд, компанийн түншүүд болон тэдний гэр бүлийн гишүүд багтах болно гэжээ.

“Сүлжмэл хот”-ын барилга, бүтээн байгуулалтын ажил бүрэн гүйцэд дууссаны дараа тус хотын оршин суугчдын тоо 2000-д хүрнэ гэдгийг Toyota Motor корпорацийн ТУЗ-ын дарга Айко Тоёода мэдэгдсэн байна.