Маргааш бол Олон улсын эмэгтэйчүүдийн эрхийг хамгаалах өдөр. Угтаа эрхийг хамгаалах өдөр гэж байгаа боловч баярын өдөр шиг баярласаар, баярлуулсаар өнгөрдөг билээ. Харин сүүлийн үед эмэгтэйчүүд энэ өдрийг жинхэнэ утгаар нь тэмдэглэх, эдлэх эрхээ нэхэхийг уриалдаг болоод байна.

    Тиймээс энэ өдрийг тохиолдуулан, эмэгтэйчүүдээ, иргэдээ төлөөлж УИХ-д ажиллаж байгаа эрхэм эмэгтэй гишүүдэд хэдэн үг дайя. Энэ сонгуулиар эмэгтэйчүүдийн квотыг нэмж, УИХ-ыг өмнөхөөсөө олон эмэгтэй гишүүнтэй болгохоор намууд амласан. Гэвч тэд амласнаасаа буцаж, квотын тоог 30%-д хүргээгүй ч намын жагсаалтаар УИХ-д олон эмэгтэй орсон.

Ингээд өдгөөгийн парламентад буй 126 гишүүний 32 нь эмэгтэй байна. Энэ нь өмнөх парламентуудтай харьцуулбал олон ч 94:32 гэвэл эрэгтэй гишүүдийн 50 хувьд ч хүрэхгүй үзүүлэлт юм. Яах вэ, эмэгтэй гишүүдийн тоогоороо Азидаа тэргүүлж, Монголын парламентын түүхэнд шинэ дээд амжилт болсон гэж тодотгоод буй.

1992 онд Монгол Улсын Их Хуралд 3 эмэгтэй гишүүн байв. Өнөөдөр энэ тоо 32 болж нэмэгдсэн ч эмэгтэй гишүүдийн хийсэн, хийж буй ажил сонгогчдын хүлээлтэд хүрэхгүй байна.

 “Хэл”-үгүй эмэгтэй гишүүд суудал бөглөж, парламентад төөрч будилж явна. Ард түмнээс сонгогдсон, жагсаалтаар орж ирсэн аль нь ч бай иргэдээ төрд төлөөлж буй хүмүүс учир хууль боловсруулах, гаргах чиглэлд идэвхийлэн ажиллах нь тэдний үүрэг.

Эмэгтэйчүүд айл гэрийг өнгөтэй, өөдтэй байлгаж, хатан ухаанаараа амьдралыг жолооддог билээ. Байгалиас заяасан уян хатан чанар, зөөлөн байдлаараа эрчүүд зонхилсон парламентад өөрсдийн дуу хоолойгоо нэгтгэж, зөөлөн хүчээрээ хууль гаргах, нийгмийн амьдралыг сайжруулах ажлаа хийх хэрэгтэй. Одоогийн парламентаас Ж.Баярмаа гишүүн мэдлэг боловсролоос гадна үг хэлж, үзэл бодлоо хамгаалж байгаа нь бусад эмэгтэй гишүүдээс ялгарч байна. Хамгийн залуу гишүүн гэгдээд буй С.Цэнгүүн гишүүн эрчим хүчний тал дээр өөрийн байр сууриа илэрхийлж, байнгын хорооны хуралдаанд идэвхтэй оролцдог нь харагддаг.

Өвөл хүүхдээр хурдан морь унуулж уралдуулахыг хориглох асуудалд Х.Баасанжаргал гишүүн идэвхтэй оролцсон. Нулимс унагаад ч болов, хүүхдээр өвөл морь унуулахгүй байх хэрэгтэй гэсэн шийдвэр дээрээ зогссон.

Харин Ц.Мөнхтуяа гишүүн 3 жилийн өмнө олон нийтийн хандив, тусламжаар байртай болгосон 4 хүүхэдтэй айлаа байрнаас нь гаргахаар сүрдүүлж, цахим орчинд хэл ам дагуулсан. Бидний хэлж заншсанаар Нара буюу М.Нарантуяа гишүүн ёс зүйн зөрчил гаргасан гэж сануулга авсан удаатай. Ингээд энэ парламентыг бүрдүүлж буй эмэгтэй гишүүдээс онцлоод, дурдаад нэрлэчих эмэгтэй гишүүн одоогоор алга аа.

Зарим нь бүүр “төөрч” будилж, юу хийх ёстойгоо ч мэдэхгүй яваа сурагтай. Уг нь өмнөх парламентын эмэгтэй гишүүд оролцоо, санал, санаачилгаараа нийгэмдээ нөлөөлж, Гэр бүлийн хүчирхийлэлтэй тэмцэх, хүүхдийн эрх, эмнэлгийн тусламж үйлчилгээний тухай хуульд өөрчлөлт оруулснаас гадна эмч, багш нарын цалингийн талаар үзэл бодлоо илэрхийлж байв. Баар, ресторан, олон нийтийн газарт тамхи татахыг хориглосон хууль батлуулж, олон хүнд буян үйлдсэн эмэгтэй гишүүн ч бий. Нам гэж талцалгүй, УИХ-ын эмэгтэй гишүүд нэгдэж чаддагийг ч харж л байлаа.

Тэдний дайд хүрч ажиллахыг сонгогчид энэ парламентын эмэгтэйчүүдээс хүсэж, шаардаж байна. Хүйсээр нь ялгаварлаж, ийм зүйл шаардсангүй. Эрчүүдийн батлуулаагүй хуулийг батлуулж, эрэгтэй гишүүдийн олж хараагүйг харж, хийж чадаагүйг эмэгтэйчүүд хийж чадна гэж итгэсэндээ ийн хүсэж, шаардаж байна. 

Эрэгтэй гишүүдийн хэлж буй үг, гаргаж буй шийдвэр нь нүдээ олоогүй, амьдралаас алсуур заримдаа бүр хатуу ч гэмээр байдаг. Өнөөдрийн Монголыг, одоогийнхоо Улаанбаатарыг хар. Эрчүүдийн байгуулсан нийгэм тиймхэн, эрчүүдийн бий болгосон асуудал арай дэндүү их байна. Эмэгтэй хүний хатан ухаан, нарийн гаргалгаа, уян шийдвэр өнөөдөр дутаад байна.