Өчигдөр буюу гуравдугаар сарын 6-ны өдөр урлагийн салбарт шинэ киноны хур буулаа. Монголын кино урлагт уран бүтээлээ туурвиж яваа жүжигчин У.Цогтбаяр, Г.Лхагвацэрэн нарын жүжигчид, “Voo”, “Skymedia” болон БНСУ-ын компанийн хамтарсан “In Da House 3” кино, мөн “Фантастик” продакшны “Цөвүүн цаг” кино улаан хивсний ёслолоо хийж, үзэгчдийн хүртээл болголоо.
Миний бие “In Da House 3” киноны талаар багахан сийрүүлж, өөрийн үзэл бодлоо хүргэж байна. Тус кино “In Da House” 1, 2 киноны үргэлжлэл болж, тэр дундаа БНСУ-ын жүжигчид тоглосон гэдгээрээ олон нийтийн дунд өндөр хүлээлт үүсгэсэн. Кино нээхийн өмнө гол дүрийн жүжигчин, продюсер У.Цогтбаяр киноны зураг авалт болон жүжигчдийн сонгон шалгаруулалтын талаар нээлттэй ярилцсан юм. Энэ талаар дэлгэрэнгүй уншихыг хүсвэл доорх линкээр зочлоорой.
Жүжигчин Г.Лхагвацэрэн, Н.Баясаа, У.Цогтбаяр, Р.Сүхболд, С.Батзориг нар “Xermel crew”-ийн уран бүтээлчид, “F Studio” хамтран “In da House” адал явдалт, инээдмийн уран сайхны киног 2021 онд үзэгчдэд хүргэж байв. Эрүүгийн цагдаа нар хууль бус гэмт бүлэглэлийн араас мөрдөх явцдаа өнгөлөн далдлалт хийж, цуйвангийн газар ажиллуулж эхэлснээр уг киноны үйл явдал өрнөж эхэлдэг бол 2022 онд “In da House: Come back” киног үргэлжлүүлэн бүтээж байв.
Тэгвэл тэдгээрийн үргэлжлэл БНСУ-ын Пусан хотноо өрнөнө. “In Da House 3” кино маш олон уран бүтээлч болон хамтран ажиллагч байгууллагуудын хүчээр 1 тэрбум гаруй төгрөгийн өртгөөр бүтсэн гэдгийг уран бүтээлчид онцолсон юм. Эхэнд дурдсанчлан БНСУ-ын “А” зэрэглэлийн жүжигчид болох Юн Жэ Мун, “Амьдралын ээдрээ” киноны Бэ Сан Дугийн дүрээр монголчуудын сэтгэлд хоногшсон Ки Жу Бун нарын жүжигчид тус кинонд дүр бүтээсэн. Юн Жэ Мун эсрэг дүрийг чадварлаг бүтээдэг гэдгээрээ олны дунд алдартай. Тус кинонд ч хар тамхины том боссын дүрийг гаргасан юм. Дэлхий даяар солонгос кино байлдан дагуулж буй энэ цаг үед солонгос жүжигчдийг Монголынхоо киноноос харна гэдэг сайхан санагдсаныг нуух юун. Тэд байгаа нь л киног чимж байлаа.
Ки Жу Бун жүжигчний тухай ярих хэрэг байхгүй биз ээ. Олон жил кинонд тоглосон хүний хувьд энэ кинонд ч дүрээ маш гоё гаргаж, өөр нэг дүрээр Монголын фенүүдтэйгээ уулзлаа.
Тэгвэл монгол жүжигчид хэрхэн тоглосон бэ?
“Тагтаа” хочтой жүжигчин Р.Сүхболдыг тэс өөр дүрээр харлаа. Даруухан, эгэл харагддаг “Тагтаа” том биетэй, чадварлаг тулалддаг гэдгээрээ Дэлхийд алдартай Ма Дун Сог шиг дүр төрхийг энэ удаа гаргажээ. Найзуудаа аюулд орсон цагт тэр гарч ирэн, ганц алгадаад л эмх цэгцэнд оруулж байв. Ямар ч хэлээр тухайн улсын төрөлх хүн шиг ярина гэдэг их хэцүү. Гэхдээ жүжигчин Р.Сүхболд солонгос хэлээр тун дажгүй ярьсан шүү. Ажил хийж яваад, солонгос бүсгүйтэй гэр бүл болж байгаа түүний дүр үзэгчдэд тэс өөр Сүхболдыг харуулсан биз. Ямартай ч түүний дүрээс хуурамч жүжиглэлт харагдсангүй.
Жижгээ, Цогтоо, Баясаа, Зоригоо нар
Тэд бол монгол цагдаа. Өмнөх хоёр бүлэгт өнгөлөн далдалт хийж, гэмт хэрэг илрүүлж байсан бол энэ удаа мөн адил хэв маягаар гэмт хэргийг илрүүлнэ. Найзынхаа хуриманд зориулж, монгол дууг солонгос хэлээр орчуулан хүргэсэн нь солонгосчуудын сэтгэлийг татан, улмаар захиалгад дарагдсан алдартай хамтлаг болж хувирна. Ингэснээр заавал хүнд ажил хийхгүйгээр дуугаа дуулж, бүжиглээд орлоготой болох нь тун таатай. Гэхдээ үүний хажуугаар цагдаагийн ажлаа хийж, гэмт хэрэг илрүүлэхээ мартах ёсгүй.
Жижгээгийн хувьд нөхдийгөө атгасан гар шиг зангидаж, чиглүүлдэг эрдүү залуугийн дүр гаргасан. Харин Цогтоогийн хошин байдал арай хэтрүүлэгтэй, онцгүй харагдаж байв. Нохой шиг гэмээр гасалж байгаа нь яг ямар учиртайг ойлгоогүй. Гэхдээ инээдтэй талаас нь хүлээж авах нэгэнд өөр өнцгөөр харагдах биз ээ.
“Амьдрал” киноны Х.Манлайбаатар
Жүжигчин Х.Манлайбаатарыг дэлгэцийн уран бүтээлээс өнөөдөр л харлаа. Хамгийн анх түүнийг “Амьдрал” киногоор таньдаг болж байв. Тэрээр энэ удаа Нямсүрэн гэх жирийн нэг монгол эрийн дүрийг элдэв чимэггүй, байгаагаараа тодхон гаргажээ. Жилээс жилд харь орныг зорьж, хар бор ажил хийж, ард үлдсэн гэр бүл, хайртай хүмүүстээ олсон мөнгөө явуулж, амьдралаа нуруун дээрээ үүрч явдаг эрчүүд олон болсон. Нямсүрэн тэдний л нэг. Солонгос улсад ирээд 20 жил болсон тэрээр монгол хүний сайхан сэтгэлээр дүү нарынхаа мөрдлөгийн ажилд туслахаас гадна өдрийн ажил олж өгдөг.
Гэвч жаргалтай зарим киноны төгсгөлд уйтгар гуниг заавал байдаг хойно. Хүүгээ их сургууль төгсөхийг нь харах юм сан гэсэн хүслээ гүйцээж чадалгүйгээр Нямсүрэн бусдын гарт амиа алдана. Х.Манлайбаатарын дүр нэгийг бодуулж, хоёрыг тунгаахаар хөнгөхөн хэрнээ сэтгэлд хүрсэн дүр байв. Түүнд халуун баяр хүргэе! Тэрээр дүр бүтээхээс гадна “In Da House 3” кинондоо продюсерээр ажиллажээ.
Залуу жүжигчдийн чадвар дутсан ч царайгаараа өнгөлөв
Саруул гэх залуугийн дүрийг царайлаг, нуруулаг, өмнө нь тайз дэлгэцийн уран бүтээлд харж байгаагүй А.Хүслэнбаяр гэх залуу бүтээжээ. Яах вэ, жүжиглэлтийн тухайд дүрээ өөрийн хэмжээнд гаргасан байв. Их хэмжээний өрөнд ороод, барьцаанд нь дүүгээ алдсан тэрээр цагдаа нартай тааралдсанаар хэрэг, явдлын учрыг олж, дүүгээ авахаар оролдоно.
Харин түүний дүүгийн дүрд жүжигчин Б.Мишээлийн дүү Б.Үжин тогложээ. Б.Үжин энэ кинонд өөрөөрөө л харагдаж байлаа. Тэр дүрдээ орсонгүй. Нас залуу учраас цаашдаа сайжрах, чадавхжих нь гарцаагүй байх.
Ийн 1 тэрбумын өртгөөр бүтсэн тус кино үзэгчдийн хүртээл боллоо. Пусан хотод нийт 36 өдөр зураг авч, олон хүний хөдөлмөрөөр бүтсэн эл киноны өнгө, дуу, зураг авалт, үйл явдал давс нь таарсан хоол шиг амттай, сонирхолтой байв. Хөнгөхөн, инээдмийн хэрнээ нь цаад мөн чанарыг нь харвал өнөөгийн нийгэмд байгаа бодит үйл явдлыг харуулж, хүний сэтгэлд нэгийг бодогдуулах утга ч байв.
Солонгосын жүжигчид Монголын кинонд дүр бүтээж, монгол уран бүтээлчидтэй хамтран ажилласан нь олзуурхмаар зүйл билээ. Энэ бол кино урлагийн салбарыг нэг алхмаар урагшлуулах, гадаадын улстай хамтран кино бүтээх үүд хаалгын нэг нь мөн. Монголд өчигдөр нээлтээ хийсэн тус кино дөрөвдүгээр сард БНСУ-ын үзэгчдэд хүрэх юм.