Дөрвөн жил тутам зохион байгуулагддаг тусгай олимпын наадам өчигдөр хөшгөө нээлээ.

Тус наадамд 100 орны 1500 тамирчин, 1000 багш дасгалжуулагч, 2000 сайн дурын ажилтан, 100 орчим залуу манлайлагчид, 500 хэвлэлийн мэдээллийн байгууллагын төлөөлөгчид болон 1300 гаруй хүндэт зочид урилгаар оролцож байна.

Энэ удаагийн наадамд Монгол Улсаас 24 тамирчин уулын цана, гүйлтийн цана, сноуборд, цасны гуталтай гүйлт, бүжиг, бөмбөгтэй заалны хоккейн төрөлд өрсөлдөх бөгөөд манай тамирчдын тэмцээн өнөөдөр албан ёсоор эхэлж байгаа юм.

“Турин-2025” Тусгай олимпын өвлийн наадмыг зохион байгуулах хорооны ерөнхийлөгч хатагтай Патриция Санретто Ре Ребауденго нээлтийн үеэр “Энэ наадмыг зохион байгуулах нь Турин хот төдийгүй бүх Италийн хувьд саад бэрхшээл, нийгмийн олон талт, ялгаатай байдлыг хүндэтгэх, эерэг хандлагыг бий болоход гайхалтай боломж юм. Энэ нь оюуны ялгаатай хөгжилтэй тамирчдын хүсэл тэмүүлэл, хичээл зүтгэл, авьяас чадварыг тэмдэглэж, хамтран амьдрах, хуваалцах соёлыг сурталчлах болно” хэмээн онцолжээ.

“Ялалт байгуулахад минь туслаач, хэрэв би ялж чадахгүй бол ялалт авчрах оролдлогыг минь зоригжуулаач – Let me win. But if I cannot win, let me be brave in the attempt” уриатайгаар тусгай олимпын өвлийн наадамд хурд хүч, авхаалж самбаагаа сорин өрсөлдөж буй Монгол Улсын баг, тамирчдадаа амжилт хүсье!