“Улаанбаатар Амозонс” баг хоёр дахь удаагаа аваргын цом өргөлөө

Өчигдөр Монголын сагсан бөмбөгийн холбооны Үндэсний дээд лигийн 2024-2025 улирлын аварга багаар Francisco Garcia, Г.Ундрах нарын дасгалжуулагчтай “Улаанбаатар Амазонс” баг тодорч, 100.000.000 сая төгрөгийн мөнгөн шагналын эзэд боллоо.

“Улаанбаатар Амазонс” баг финалын шатанд “Омни Хүлэгүүд” багтай учраа таарч нийт 6 цуврал тоглолт хийж 4:2 харьцаагаар өрсөлдөгчөө буулган авч “Үндэсний дээд” лигийн аварга, цомын эзэн боллоо.

    Харин тэдний хүчтэй өрсөлдөгч, өнгөрсөн улирлын аваргууд “Омни Хүлэгүүд” мөнгөн медаль хүртэж, 50.000.000 төгрөгөөр шагнуулсан бол “Аравт” болон АОДЭ М Винкс багууд хүрэл медаль хүртэж, 25.000.000 төгрөгийн мөнгөн шагналын эзэд боллоо.

  Амазонсын лидер О.Хулан Хятадын лигт тоглохоор явсан ч түүний орон зайг Н.Нандинхүслэн, Б.Ариунцэцэг нар нөхөж багаа хожилд хүргэлээ. Түүнчлэн тус багт импортоор ирсэн Грэйс Берг ч үүргээ сайн биелүүлэв. Арван жилийн сурагч Н.Нандинхүслэнгийн хувьд өвдгөндөө бэртэл авч, үндэсний дээд лигт өрсөлдөх эсэх нь тодорхойгүй байсан. Хэдий хүнд бэртэлтэй байсан ч АНУ-д юу сурч, хэрхэн сайжирснаа харуулж, аваргуудын эсрэг маш онцгой тоглолтыг үзүүлсэн юм.

Сонирхуулахад “Омни Хүлэгүүд” лигийн нээлтийн тоглогтод “Улаанбаатар Амазонс” багт 65:71 харьцаагаар хожигдож байсан юм. Тэгвэл лигийн улирлын финалын төгсгөлд мөн хожигдлоо.

3х3 сагсанбөмбөгт О.Хулантай мөр зэрэгцэж, олон тэмцээн уралдаанд хожиж, хожигдож явсан Б.Ариунцэцэг 2024-2025 оны улирлын Үндэсний дээд лигийн “Үнэ цэнтэй” тоглогчийн шагналыг хүртлээ. Тэрээр финалын цувралын тоглолтуудад 21.7 оноо, 13.5 самбар, 3.0 оновчтой дамжуулалт, 2.0 бөмбөг таслалт, 43.1 хувийн довтолгоо дунджилсан байна.

Аваргын төлөөх тоглолтод 18 настай Н.Нандинхүсэл онцгой байлаа. Түүнийг “тэргүүн тоглогч”-ийн хэмжээнд яригдаж байсан гэхээр ямар ур чадвартай, өсөх ирээдүйтэй тамирчин гэдгийг харж болно. Тэрээр финалын тоглолтод маш хурдтай, дайчин байж өнгөрсөн улиралд хожигдсон хариугаа авлаа.

    Мөн үнэ цэнтэй тоглогчоор шалгарсан Б.Ариунцэцэгийг дурдахгүй байхын аргагүй. Тэрээр өнгөрсөн улиралд харамсалтайгаар хожигдож, нулимс дуслуулан лигээ өндөрлүүлж байсан билээ. Харин жилийн дараа илүү хүчтэй эргэн ирж, багийнхаа хамт аварга болж хүслээ биелүүлэв.

“Омни Хүлэгүүд” багийн тухайд чадварлаг, туршлагатай тамирчдаар багаа бүрдүүлж, лигийн турш хамгийн хүчтэй баг байсан. Финалд тэднийг өрсөлдөгч багаа төвөггүйхэн хожиж, лигийн хошой аварга болно гэж сагсан бөмбөгийн зарим үзэгч, хөгжөөн дэмжигч нар үзэж байсан ч цувралын 6 дахь тоглолтдоо хожигдож, лигээ өндөрлүүлэв.

Энэ жилийн лигт эмэгтэй багууд дунд олон онцлох зүйл байлаа. Нэг үеэ бодоход эмэгтэй тамирчдыг үнэлэх үнэлэмж сайжирч, эрэгтэй лигийн хэмжээнд дөхөж очих жишигт хүрлээ. Тодруулбал өнгөрсөн улиралд “Хасын Хүлэгүүд” багаас өрсөлдөж аваргын цом хүртэж байсан тамирчин Б.Өнөрзаяа “Аравт” багтай 40 сая төгрөгөөр гэрээ хийсэн юм. Энэ нь монголын сагсан бөмбөгийн түүхэнд эмэгтэй тамирчдаас хамгийн өндөр гэрээ хийсэн тамирчин болсон билээ.

Өрсөлдөөнтэй, гал гарсан үзэгчдийг огшоосон удаан үргэлжилсэн эмэгтэй лиг ийн өндөрлөж, аваргуудаа тодрууллаа.