Монголд цахим мөрийтэй тоглоомоор дамжиж, 500 сая ам.доллар буюу 1.7 тэрбум төгрөг гадагшаа гарсан гэж ЗГХЭГ-ын дарга О.Учрал мэдээлсэн. Нэг ёсондоо энэ хэмжээний мөнгийг монголчууд спортын тэмцээнд мөрий тавьж алдсан аж. Байр, машин, амьдрал ахуйгаа золиослон, мөрийд тавьсан мөнгийг нь агент гэх хүмүүс авсан гэж мөнгөө алдсан хүмүүсийн олонх нь буруутгадаг. Тэгвэл үнэхээр агент гэх хүмүүс тэднийг уриалан дуудаж, ятгаж, мөнгийг нь авдаг уу гэдгийг торуулахаар нэгэн агенттай ярилцсан юм. Эх сурвалжаа хамгаалахын тулд нэр, дүрсийг нь нууцлав.

Та спорт бооцооны агент хийгээд хэр удаж байна. Яагаад ийм ажил хийх болов?

Монголын нийгэм ямар байгаа билээ. Бүх юмнаас татвар авдаг болчихсон. Цалин буугаад, гар дээр ирэх нь бага. Монголд нэг ажил хийгээд, амьдрах үнэхээр хэцүү болсон. Тийм болохоор бусдын адил ажлынхаа хажуугаар нэмэлт орлоготой болъё гээд энэ ажлыг хийгээд 5 жил болж байна. Агентууд хүмүүсийн цэнэглэсэн мөнгөний 2 хувийг буцаан олголт гэж авдаг. Мөн татсан мөнгөний 2%-ийг бонус болгож авна.

Жишээ нь: 20.000 төгрөгөөр цэнэглэхэд 2 хувь нь 200 төгрөг. Энэ мөнгөө тэр хүн 200.000 төгрөг болгож өсгөөд буцааж авахад, татах мөнгөний 2 хувь болох 4000 төгрөгийг бонус болгож авдаг. Сардаа 2-3 сая төгрөгийн нэмэлт орлого надад орж ирдэг гэсэн үг.

-Ийм ажил хийхээр амьдралд өөрчлөлт хэр орж байна?

Амьдралд нэг их биш ч тодорхой хэмжээгээр өөрчлөлт гарсан. Бусад хүний ярьж байгаа шиг супер баян болчихсон хүн биш. Хэрвээ тийм баян болсон бол ажлынхаа хажуугаар энэ ажлыг хийхгүй. Зөвхөн энэ ажлаа хийнэ шүү дээ. Ажлын хажуугаар олдог давхар орлого юм даа.

-1xbet, спорт бооцоонд мөрий тавьдаг залуус олон болж, гэр бүлээсээ салан, амьдралаа сүйрүүлж байна. Энэ талаар юу гэж боддог вэ?  

Тэр бол харамсалтай. Ер нь хувь хүний ухамсрын л асуудал байх даа. Сүүлийн үед спорт бооцоо тавьж байгаа хүмүүсийн тоо нэмэгдэж байгаа. Гэхдээ бооцооны мөнгөн дүн багассан. 5, 10, 20, 30 мянган төгрөгөөр ихэнх хүмүүс цэнэглэдэг. Түүнээс их хэмжээний мөнгөөр цэнэгэлдэг хүмүүс бас байдаг.

-Их хэмжээний мөнгө гэхээр ойролцоогоор хэдэн төгрөг вэ?

3-5 сая төгрөгөөр хүмүүс бооцоо тавьдаг, нэг удаадаа. Гэхдээ тэр хүмүүсийн хаана, юун дээр бооцоо тавьж байгааг би мэдэхгүй. Зүгээр л цэнэглэж өгдөг. Тэр хүмүүс мөнгөө юунд зарцуулах нь өөрсдийнх нь хувийн асуудал. Хүмүүсийн дунд зуучилж өгснөөрөө буруутан болоод байгаа юм л даа. Түүнээс тэр хүмүүсийн мөнгийг агентууд аваад, 10 төгрөгөөр цэнэглэнгүүт нь муриад алга болдог юм байхгүй шүү дээ. Жишээ нь: Монголоос Доржоо, Батаа хоёр “Лейкерс” багийг хожно гээд бооцоо тавьсан байна. Гэтэл “Л.А.Лейкерс”-ийнхэн хоорондоо “Хэдүүлээ хожигдоод Доржоо, Батаагийн 10.000 төгрөгийг авчихъя” гэж ярихгүй шүү дээ. Тэгэнгүүт хүмүүс “Спорт бооцоонд хамаг мөнгөө алдлаа” гээд байдаг. Хүмүүс өөрийн ухамсрын асуудлаас болоод, мөнгөө их хэмжээгээр алддаг. Сэтгэл зүйн асуудал байгаад байна. Үүн дээрээ хүмүүс өөрсдөө анхаарах хэрэгтэй. Эрэлт байгаа юм чинь нийлүүлэлт байна гэдэг утгаараа агентууд энэ ажилд ордог. Тиймээс бооцоо тавиад алдсан ч харамсахааргүй хэмжээгээр орох хэрэгтэй.  Залуучууд хэт шунаад байгаа юм шиг санагддаг. Битгий шунаарай л гэж захья даа.

-Цаашид цахим мөрийтой тоглоом, спорт бооцоог хуулиар хориглож, хаах тухай яригдаж байна.

Бүгдийг нь хаах л байх. Хаалаа гээд амьдрал дордоод байх юм байхгүй. Үндсэн ажлаа хийгээд л явна. Гэхдээ улам л далд хэлбэр лүү орох байх даа. Энд зөв зохицуулалт л хэрэгтэй.